Shillong, Naitung 07:
Ka jingpynlip ïa ka bording ilektrik ha ka Jylla yn pynduna noh da shi kynta na ka 8 kynta kaba ju long baroh shikatta sha ka 7 kynta.
Kane kan treikam naduh ka Sngi Saitjaiñ (8 tarik Naitung) ha kaba ka por pynlip bording ilektrik kaba ju long 8 kynta baroh shikatta, kan long noh 7 kynta.
Ïa kane ka shi kynta yn pynduna ban pynlip bording ilektrik ha ka por nohphai sngi, kata, ha ka jaka ban pynlip naduh 1 baje haduh 3 baje, kaba long 2 kynta, yn pynlip noh ïa ka bording ilektrik tang shi kynta ha ka nohphai sngi.
Na ka liang ki bor ba dei khmih ki la pynshai ba wat la ka jingdon ka um ha pung Umïam ka la kham biang, hynrei ym pat lah ban weng noh shisyndon ïa ka jingpynlip bording mynta namarba ïa ka bording kaba pynmih mynta, la hap ban pynphai noh shwa sha kito kiba la ai bording ïa ka Jylla ha kito ki bnai ba rang tyrkhong ha kaba la shim kylliang ïa ka bording na ki ban lait na ka jingpynlip bording ha kito ki bnai.
Ka tyllong khubor ka ïathuh ba ka jingpynlip bording kaba shi kynta ha ka por mynstep, kata 10 baje haduh 11 baje kan dang neh, bad ïa ka jingpynlip bording kaba 5 kynta ha ka por shiteng synïa naduh 12 baje haduh 5 baje mynstep kan dang bteng shwa. Yn shim ki lad ki lynti ban pynduna ïa kane ruh suki-suki ynda la kham sting ka lyngkhor ka MeECL ban pynphai ïa ka bording kaba la pyndonkam baroh shikatta ha ki bnai tlang bad bnai pyrem kiba dei ki bnai ba rang tyrkhong.
Ka tyllong khubor ka ïathuh ba ïa ka jinglong jingman yn hap peit thuh ha kine ki sngi, bad ynda la dep ban shim ïa ki lad ki lynti ban ïoh thied bording ha ka dor kaba kham jem, yn sa kham pynduna ïa ka por ba pynlip bording ilektrik.
“Ïa mynta, la sangeh ban thied bording ha ka dor kaba rem namarba la kham dap ka um ha ki pung ba pynmih bording ilektrik, hynrei ka jingthied bording dang donkam ban leh tangba hap ap ïa ka ïew kaba kham duna dor. Baroh shikatta ngi hap ban thied ha ka dor ba rem namarba ngim don lad da kumwei pat,” la ong ka tyllong khubor ba ïajan bad ka Sorkar.
