Shillong, Naitung 07:
Ka Synjuk Nongñiah Taxi Sor bad Khapsor ki la leit ban ujor sha u Principal Secretary & Commissioner Transport ka sorkar jylla uba shong ha Sawlad, Shillong ban tuklar halor ka jingbymshah ki nongtrei na ophis District Transport na Ri Bhoi District ban leit buh briew ki Local Taxi na Shillong sha Umroi Airport.
Haba ïakren bad u Bah Shimladbiang Rynjah uba dei u Vice-President ka Synjuk Nongñiah Taxi Sor bad Khapsor u la ïathuh ba ka seng ka la hap ban leit ujor sha u Commissioner Transport ka jylla namar ym lah ban pdiang ba ki local taxi na Shillong kin shah khang ban leit buh briew sha kad liengsuiñ Umroi.
U la ong baroh shi katta ki ju leit buh briew ym don ba khang, hynrei balei ba mynta ka sngi ka 7 tarik Naitung 2023 la shah khang bad shah daiñ kuna ruh.
U la ong ba lada shah khang ïa ki local taxi na Shillong sha kiwei ki district, ki ruh kin khang ïa ki local taxi na kiwei ki district ban wan sha Shillong.
Shuh shuh u la ïathuh ba ki local taxi ki khlem leit kamai ne ban knieh ïa ki local taxi kiba don ha Ri Bhoi district, hynrei ki shu leit buh briew sha kad liengsuin, hynrei lada shah pyndik ïa ki nongñiah taksi ka seng ruh kan sa leh da kumwei pat.
