ïatreilang ka TKM, ASDC bad ka DBTS, Shillong na ka bynta ka Rural Skill Enhancement & Employability Through Toyota Technical Education Program [T-TEP]

Shillong, Naitung:

Ka Toyota Kirloskar Motor [TKM] mynta ka sngi ka la pynbna ïa ka jingseng ïa ka T-TEP institute ba 63 ha Don Bosco Technical School, Shillong bad kaba long ruh ka jaka ai jinghikai ne T-TEP Institute banyngkong ha ka jylla Meghalaya, da ka jingkyrshan jong ka Automotive Skills Development Council (ASDC). Ka jingthmu jong kane ka jingpyrshang ka long ban nang kyntiew shuh shuh ïa ki sap jong ki samla pule da kaba phai khmat bha sha ki thaiñ nongkyndong, da kumta yn lah ban nang kyntiew ïa ka rukom ai kam ai jam lyngba ki sienjam ai jinghikai jong ka kompani ïa kaba la tip kum ka Toyota Technical Education Program (T-TEP).

Ïa kane ka lympung la plie da ka Dr Mazel Ampareen Lyngdoh kaba long ka myntri ka tnad Agriculture and Farmers’ Welfare Department,Health & Family Welfare Department, Information and Public Relations Department, Law Department, ka sorkar jylla Meghalaya, ha ka jingïadon lang jong u Vikram Gulati, Country Head bad Executive Vice President,TKM, u Fr Arcadius Puwein, Principal, Don Bosco Technical School, Shillong, u Arun Lawaniya, Deputy Lead – State Initiatives and Capacity Building, ASDC bad u Ambarish Das, Vice President, Highland Toyota uba long ruh u Senior Executives na TKM.

Da ka jingthmu ban nang sei shuh shuh ïa ki briew kiba don ïa ka sap ka phong bad kiba tbit ïa ki kam kiba ïadei bad ki kam shna kali, ka T-TEP ka ïai bteng ban noh synñiang sha ka ri ha kaba ïadei bad ka thong jong ka “Skill India” Mission. Ha kaba ïadei bad ka T-TEP, ka TKM ka ïadon bynta bad ki 63 tylli ki jaka ai jinghikai kata ki ITI/Diploma Institutes kiba don ha ki 26 tylli ki jylla. Kat haduh mynta, palat 12,000 ngut ki samla kiba la ïoh jinghikai bad kumba 70% na ki samla kiba la pyndep ïa ka jingshah hikai ki la trei ha ki kompani shna kali bapher bapher bad ha ki jaka die kali ha kylleng ka ri.