Shillong, Naitung 07:
Ka jingsahteng ka surok saw lynti na Umshyrpi shaduh Hynñiewmer ka daw baroh ka lah ban dei namar ka jingsuki palat ban pynïaid ïa ki pipe um. Kane ka kam ka la sahkut mynta la jan ar snem naduh ba la sdang pynkhyllem ïa ki diengkseh kiba don ha shi lynter jong katei surok.
Ka jingsdang ban pynkhyllem ïa ki diengkseh ha Hynñiewmer, Upper Shillong kaba don mar pyrshah ïa ka shlem treikam jong ka Eastern Air Command ka dei ha u Naitung 2021. Kane ka dei ruh ha ka por ba ka khlam COVID-19 ka wan lynshop ha ka sien ba-ar.
Ka jingpynkhyllem ïa ki diengkseh ha shi lynter ka surok Upper Shillong ka long ban sdang shna ïa ka surok saw lynti lane four-lane na Umshyrpi sha Hynñiewmer. Hynrei haba la pom lut ïa ki diengkseh kat haduh mynta mynne ka jingtrei ïa katei ka surok ka la sahkut noh namar ka jingsangeh treikam ka kompani.
Haba ïakren bad u nongaibuit jong u Myntri Rangbah ka Jylla, Bah Hamlet Dohling, u la ong ba ka jingslem ka surok four-lane sha Upper Shillong ka daw baroh ka jingslem ban thep ïa ki pipe um kiba wan na Mawphlang ban sam um sha ki paidbah ka sor Shillong.
U la ïathuh ba ïa kane ka surok (4 lane) hap ap haduh ban da thep lut ki pipe um namar ki hap ban ïaid ryngkat ryngkat khnang hynrei lada ym don ki pipe um tharai mynta kane ka surok ka la dep beit.
Kumta u don jingkyrmen ynda la dep lut ki pipe um kane ka surok kan sa ïoh ban pyndep noh katkum ka jingdonkam ki paidbah jong ka jylla.
Katkum ka jinglap u nongthoh khubor ka jingthep ïa ki pipe um ka dang ïaid mynta ha Hynñiewmer ka lad ban leit sha Elaphant Fall, kaba dei ruh ka lad sha Sohra bad Mawphlang.
Ha kawei ka khubor, kawei ka longkmie na shnong Mawkhan, Upper Shillong ka la ong ba bun ki MLA ha kine ki phew snem haba ki wan ha ka shnong jong ki, ki wan da ka kali kaba jrong kaba kynjang khnang ban nym sngewthuh ïa ka jingsniew jong ka surok, hynrei mynta ka la pynpaw ka jingsngewkmen ba naduh ba long MLA u bah Hamlet Dohling ka surok ka la bha.
Ïa kine ki kyntien kane ka longkmie ka la pynpaw da ka jingrhem ka mynsiem haba ka ai jingkren ha ka jingïalang ban plie ïa ka surok dewbilat da u MLA barim ka Mylliem, Bah Hamlet Dohling ha ka shnong Mawkhan ban pynpoi sha shnong Rangbihbih kaba jrong kumba 600 meter ha ka jingmang pisa kaba sawphew lak tyngka na ka skhim PMKKY na ophis BDO Mylliem Block, East Khasi Hills District.
Wat la hapdeng u slap uba jur hynrei ïa kane ka surok la lah ban plie da ka jingsakhi lang ki riew rangbah, ki longkmie jong kane ka shong kaba la long mynta ka sngi ka 7 tarik Naitung 2023.
Ïa kane ka surok dewbilat la shna da kaba sïang lang bad ka plastic ba kan skhem ban long ruh ban nïah kali khnang ba k ipaidbah kin ioh ban pyndonkam ban kit jingkit haba leit rep leit riang sha ki jaka lum.
