Nongpoh, Naitung 07:
Ha kawei ka jingjia ha ka step Sngi Thohdieng, kawei ka trok kit nar rod kaba la pynïeng harud surok Umroi Bypass marjan bad ka ICAR ka la kem ding kynsan ha ka por 9 baje mynstep kaba la wanrah ïa ka jingduh jong ki bynta ba shakhmat jong katei ka kali, khamtam ka jaka shong jong u nongñiah.
Katkum ka tyllong khubor na ki pulit, la ïathuh ba katei ka trok kaba don ïa u nombor WB 57 B 1028 ka la ngat shwa ha ka jingtakhuh kali ha ka 5 tarik Naitung kaba la pynlong ïa ki bynta jong ka jaka buh umphniang ban pei bad hynne ka step, ka la kem ding kynsan katba u nongñiah lem bad u nongbud ki dang leit thied jhur.
Mar ïa ïoh jingtip halor katei ka jingjia, ki pulit pynlip ding na ka thanad Umïam ki la leit bran bran ban pynlip ïa ka ding kaba la sdang ban klang, bad tang hadien kumba katto katne por, la lah ban pynlip noh ïa ka ding.
Halor kane ka jingjia, na ka liang ki bor pulit ki dang pynlong ïa ka jingtohkit ban lap ïa ka daw tynrai jong ka jingkem ding kynsan katei ka trok.
