Shillong, Naitung 07:
Uwei u samla uba na ka shnong Umeit, Ri-Bhoi distrik, u la khlad noh ha ka 5 tarik Naitung hadien lai sngi ba u la shah shoh shah dat ha ki briew ki bym lah ban tip ki dei kiei ha Lad Umroi.
Utei u samla u dei uba la tip kyrteng kum u Ajay Kharhujon. Katkum ka ejahar ba la ai da ka kmie jong une u samla, ka Kong S Kharhujon, ha thanat Umïam ha ka 6 tarik Naitung, la ïathuh ba ha ka 2 tarik Naitung ha ka por kumba 3 baje janmiet, u Ajay u la mih na la ïing ban leit ïaid kai, hynrei haduh ka por 6 baje janmiet, u khlem wanphai satia sha ïing.
“Nga la pyrshang ban wad ïa u, hynrei nga lap pynban ba u la thiah harud surok ha ka lynti ba sdang ka Flyover kaba dei ka Lad Umroi,” la ong ka Kong Kharhujon ha ka jingujor.
Ka la ïathuh ruh ba la pynkit ïa u Ajay sha Bhoirymbong CHC, hynrei na kane ka jaka sumar, la phah rah noh ïa u Ajay sha Shillong Civil Hospital. Ym tang katta, na Civil Hospital, la bthah ïa ki bahaïing hasem ba kin kit ïa u Ajay sa sha NEIGRIHMS, Mawdiangdiang. Tangba ka kmie ka la ïathuh ba na ka daw ba u la shitom jur, la kit noh sha Nazareth Hospital, Shillong namarba ka kham jan.
Hynrei, ha ka 5 tarik Naitung, ka la ong ba u Ajay u la khlad noh ha Nazareth Hospital bad ïa ka ‘post-mortem’ ïa ka met kaba sah la leh ha NEIGRIHMS ha ka 6 tarik Naitung.
“Ha kaba ïadei bad katei ka jingjia, ngi ïoh jingtip lyngba ka ‘phone call’ ba u Ajay u la shah shoh shah dat ha ki briew, bad ïa kita ki briew ngim tip. Kumta nga kyrpad ïa phi ban pynwad jingtip lem khnang ba ngin tip mano kiba ktah kti ne shoh ïa u, bad ban pynshitom ruh katkum ka aiñ,” la ong ka kmie u Ajay.
