Shillong, Naitung 07:
Ka jingpynjaboh ïa ka mei mariang ka lah ban long ha kiba bun ki liang la ka long ha ka jingbret pathar ïa ki jaboh jabaiñ, ki lynti ki syngkien, ki um ki wah bad wat ka jingpynjaboh ïa ka lyer ruh kumjuh lyngba ka tdem kaba mih na ki karkhana bad kali ruh kumjuh.
Ha kaba ïadei bad ka lyer, ki paidbah ki donkam ïa ka lyer kaba khuid kaba suba ba kin ring bad pynhiar mynsiem. Kum ki paidbah ruh ki don la ka jong ka bynta ba kin leh eiei ban pynduna ïa ka jingjaboh jong ka lyer kata ban pynduna da kaba pyndonkam da ki kali ‘Electric Vehicle’ lane ki kali kiba pyndonkam da ka bording.
Wat ha nongbah Shillong ruh ki la don katto katne ngut ki briew kiba la pyndonkam da ki kali bording lane ki thuk thuk ar shaka bad lai shaka khamtam ha East Khasi Hills District ki la don haduh 74 tylli ki kali kiba la ïaid da ka bording.
Katkum ka jingïoh jingtip na ka shlem treikam u District Transport Office (DTO), kata naduh ka 1 tarik u Kyllalyngkot 2020 haduh ka 6 tarik u Naitung 2023, ki la don haduh 74 tylli ki kali bad ki thuk thuk kiba pyndonkam da ka bording kiba la wan ban pynrung kyrteng hapoh katei ka shlem treikam.
Katkum ka kyrdan ba la phiah ïa kitei ki kali bording la phiah ïa ki ha ki saw bynta kiba kynthup ïa ki kali ‘Goods Carrier’ lane ki kali kit mar kiba don 2 tylli, ki ‘M-Cycle/Scooter’ lane ki thuk thuk ar shaka ki don 39 tylli, ki ‘Motor Car’ lane ki kali saw shaka ki don 18 tylli bad ki ‘Three Wheeler’ lane ki kali lai shaka ki don 15 tylli.
