Shillong, Naitung 07:
Namar ka jingïai bteng jong ka Meghalaya Energy Corporation Limited (MeECL) ban pynlip ïa ka bording da bun kynta ha ka shisngi khamtam ha ka por mynmiet ka la buh jingeh shikatdei eh ïa ki samla pule ka jylla kiba dang pynkhreh ïa ka eksamin bapher bapher.
Ha kaba ïadei bad kane, na ka liang ka North Eastern Hills University Students Union (NEHUSU) ha ka Sngi Thohdieng ka la leit ban aiti da ka jingthoh ha u Myntri ka tnad bording ka Sorkar Jylla, u A.T Mondal ban pynsngew halor ka jingeh ba ki samla pule jong ka skulbah NEHU ki ïakynduh ban pynkhreh ïa ki eksamin namar ka jingpynlip bording jong ka MeECL kaba dang ïai bteng tat haduh kine ki sngi.
Haba kren sha ki lad pathai khubor hadien ka jingïakynduh ïa u Myntri, na ka liang jong ki nongïalam ka NEHUSU ki la ong ba ki samla pule jong ka NEHU ki dang don hapdeng ka eksam phainal jong ki, hynrei na ka daw jong kane ka jingpynlip bording ka la pynlong ïa ki ba kin shem jingeh haduh katta katta ban khreh kot ha ka por mynmiet. Nangta kitei ki nongïalam jong ka NEHUSU ki la ïathuh ba ka eksamin jong ki samla pule ka skulbah NEHU ka la sdang naduh une u bnai ba mynta kata u Naitung bad kan kut pat haduh ka 14 tarik u Nailar 2023.
“Na ka liang ka jong ngi, ngi shu wan ban kyrpad ban weng shwa ïa ka jingpynlip bording mynta shipor ha kane ka por eksam kaba dei naduh mynta u Naitung haduh u Nailar”, la ong kitei ki nongïalam ka NEHUSU.
Na ka liang kitei ki nongïalam ka NEHUSU ki la ïathuh ba u Myntri ka tnad bording u la ong ba un sa pyrshang na ka liang ka jong u katba lah ban weng ïa kane ka jingeh kaba ki khynnah pule ka jylla ki ïakynduh.
“Ngi kyrpad na ka liang ka jong ngi ïa ka sorkar ba kan pyrshang ban peit bad ban lah pynbiang noh ïa ka bording hapoh ka jylla ka jong ngi bad ba nym don ka jingthut na ka bynta ki khynnah pule ki jong ngi”, la ong kitei ki nongïalam.
Shuh shuh kitei ki samla pule ki la ong ruh ba katba dang mih ki sngi, ka pule puthi hapoh kane ka jylla ka la nang hiar, hynrei ki nongïalam kiba shong ha ki shuki ki kwah ïa ki khynnah pule lane khynnah samla ba kin biang ha ka pule puthi bad ban don napdeng ki Khasi ki para jaitbynriew ban pas ïa ka eksamin UPSC bad ban long kum IAS hynrei ka dei ka sorkar jylla pat ka bym lah ban pynbiang ïa ka jingdonkam jong ki samla pule.
“Naei keiñ u khynnah un lah ban kiew lada ka bording kam don, ban pule kot ym ïoh? Ka jinghiar naduh ka Secondary, Higher Secondary haduh ki Degree bad haduh ka NEHU ruh mynta ka la hiar sha ka kyrdan ba wat ban ïathuh ruh ka la long kaba sngewlehraiñ ïa ngi ki khynnah NEHU”, la ong kitei ki nongïalam ka NEHUSU.
