Shillong, Naitung 07:
U Superintendent of Police ka East Khasi Hills (SP), Bah Sylvester Nongtnger ha ka Sngi Thohdieng u la ong ba ka jingjia kaba la jia ha ka miet shiteng synñia jong ka 7 tarik mynta u bnai ka dei namar ka jingkajia hapdeng ki 2 kynhun kiba la shongshit.
“Kane ka dei ka jingjia kaba rit…ka don ka jingkajia ha surok, ym dei hapoh thanat hapdeng ki ar kynhun,” la ong u SP haba kren sha ki lad pathai khubor.
U la ïathuh ruh ba ynda kitei ki 2 kynhun ki la poi ha thanat Laitumkhrah ban ujor ejahar, ki sdang kajia para ma ki bad ka la don ruh ka jingkawang ktien bad ki ophisar kiba don ha katei ka thanat.
“Ynda ki ophisar jong ngi ki la batai sha ki ba dei ban ujor ejahar, kawei ka kynhun ka long kaba kloi ban ujor, kawei pat ka kynhun ka kyntait ban ujor ejahar. Hadien kata ka don ka jingïakynad hynrei ki ophisar ki la ïaleh katba lah ban pynjai-jai bad batai sha ki ban ujor ïa ka ejahar,” la ong u Bah Nongtnger.
Hadien katei, u la ïathuh ba bun ngut ki briew ki wan shapoh thanat katba ki don ruh shiteng ki ïeng shabar.
“Katba ki dang ïakren ïa pynbeit shapoh, kiba don shabar ki thang ïa ka kali,” la ong u SP.
Ha kajuh ka por, u la pyntikna ba ka don tang kawei ka ejahar ba la aiti haba ïadei bad katei ka jingjia bad kumta kam dei satia ba ki pulit kim shym la pdiang ïa ka ejahar.
Haba kylli la ka tnad ka la pynithuh ne em ïano-ïano, u la ong, “La dep ban pynngat mukotduma bad ngin sa tohkit ïa kane. Hooid ngi la pynithuh hi katto-katne ngut.”
Ha kawei ka liang, u la ong ba katto-katne kiba ïadon bynta ha katei ka jingkajia ki la pyrshang ruh ban knieh ïa ki tiar jong ki CRPF, hynrei na ka liang jong ki (CRPF) kum shi bynta ban ïada ïalade ki la shu khyrwit malu-mala ïa ki da ki lathi.
“Ki CRPF lei kim shym leh eiei, ki la dep la ka kam bad ki mut leit phai noh sha jaka sah lajong. Ha ka por ba ki dang mih, ki la shah thombor bad kumta ki don hok ban beh noh ïa ki. Ki ophisar nangne na thanat ki la leit ban pynjai-jai bad ki CRPF ki la leit noh. Ym shym la don mano-mano ba mynsaw,” u la ong.
Na ka liang utei u heh pulit u la ong ba kum shi bynta ban khang lad ïa ki jingkulmar, u la ïathuh ba ha ka por mynmiet ka tnad ka ju phah pulit ban pahara ha ki jaka ba kham kynjah khnang ban wanrah ïa ka suk ka saiñ hapoh ka nongbah.
Shuh shuh u la bynrap ba um shym khmih lynti ïa katei ka jingjia namar ka dei tang ka jingjia kaba rit ha surok hynrei hadien ba la shongshit bad ba la bun briew, ka la ïalam sha katei ka bynta.
“Ngi ju kren barabor halor ka suk ka saiñ bad bym dei ban don kano-kano ka jingkulmar ha baroh ki liang,” la bynrap u SP.
Kum ban shu kdew hangne, ha ka miet shiteng synñia jong ka 7 tarik mynta u bnai ka la don kawei ka jingjia shah thang kali ha thanat Laitumkhrah hadien ba ka la don ka jingkynnoh ïashoh hapdeng ki ar kynhun ha ka thaiñ Laitumkhrah.
