Nongstoiñ, Naitung 07:
Ka Regional Committee halor u pud u sam jong ka West Khasi Hills District ha ka jingïalam jong u Bah Paul Lyngdoh, Myntri sorkar, kum u Chairman ha ka Sngi Thohdieng ka la sdang ïa ka jingïakren bad ïatai bad peit bniah halor ka kam pynbeit pud ïa ki jaka khappud hapdeng ka Assam bad ki bynta kiba don ha ka West Khasi Hills jong ka Meghalaya kaba dei ka Langpih Sector.
Ïa katei ka jingïakren la pynlong ha TRYSEM Hall Nongstoiñ da ka jingwan ïashim bynta da ki dkhot ka Committee ba kynthup ïa u Bah Renikton Tongkhar, MLA Mawkyrwat, R.G. Momin, MLA Rambrai, Bah Bajop Pyngrope, MDC Rambrai, Bah Pynshngaiñ N. Syiem Deputy CEM ka KHADC, u Bah K.P. Pangniang, President HSPDP, u DC bad SP ka West Khasi Hills.
Nalor kitei ki dkhot la don lang ruh u samla Robertjune Kharjahrin, President HYC sengkmie uba long ruh u Legal Adviser ka KHADC, ki dkhot jong ki kynhun seng bapher bapher na ka West Khasi Hills, ki nongïalam shnong na ki shnong khappud kiba hap hapoh ka Langpih Sector, ki nongïalam Hima kum na ka Hima Nongmynsaw bad kiwei kiwei.
Haba kren sha ki lad pathai khubor hadien ka jingïalang, u Bah Paul u la ong ba ka jingïakren kaba nyngkong jong ka Committee halor ka kam ïa pynbeit pud ka long kaba seisoh bha naba la ïoh ban ïakren ïa shibun kiei-kiei kiba dang dei ban pyndep. Na ka liang ki bor District ka West Khasi Hills ki la wanrah ruh ïa ki bynta kiba kongsan ban pyni ïa ka jingdon jong ki shnong kiba long kloi ban don bad ka Meghalaya.
U la ïathuh ruh ba ki la don haduh 41 tylli ki shnong Khasi bad Garo kiba hap hapoh ka Langpih Sector kiba la wan ïashim bynta ha ka jingïalang ban ïakren ïa ka kam pynbeit pud ha kane ka sngi.
Shuh shuh u Bah Paul u la ïathuh ruh ba na ka thup jong ki 52 tylli ki shnong, ki don 41 tylli kiba la ai da ka jingthoh bad kiba la mynjur ba kin don ha Meghalaya bad 9 tylli kiba la pynpaw ban don sha Assam.
U Bah Paul u la ong ruh ba ka Committee ka la ïa kut ba da ka jingpyntip ïa kitei ki shnong yn leit ban jurip ïa ka Langpih Sector ha ki khyndait sngi ki ban wan bad ïa kiwei kiwei pat ki jingdonkam kum ka GIS Mapping ka la nang ïaid shakhmat.
U la ong ruh ba ka Committee kan sa shong ïa ka jingïalang ban pynsngew ïa kaei kaba mih na kane ka jingïalang ba mynta ka sngi.
U Bah Renikton uba dei u dkhot ka Regional Committee bad Chairman barim ka Committee u la ong ba ka tynrai bad jinglong jong ki briew ka dei kawei ka mat ïa kaba ka sorkar ka la buh hakhmat na ka bynta katei ka kam. Ïa mynta ym pat lah ban tip tikna kino ki shnong kiba kwah sha kano ka jylla namar kane kan shai tat haduh ba yn da pynlong shwa ïa ka jingleit jurip shaduh jaka khnang ba yn sngewthuh ïa ka mon jong u paidbah hangno ki kwah ban don.
Shuh shuh u la ong ba watla ki la don ki shnong ki bym shym la wan ha katei ka jingïalang, hynrei kin nang ïaid shaphrang ban pynsngewthuh bad la shaniah ruh ha ki nongïalam shnong ba kin nang buddien ban pynsngewthuh ïa katei ka kam. U Bah Renikton u la khmih lynti ruh ba yn lah ban pynbeit ïa kane ka kam da ka lynti jong ka jingïahunlang bad da ka jingsuk.
