Shillong, Naitung:
U Myntri Rangbah ka Jylla, Conrad K Sangma u la ong ba ka jingwan ka jong u sha Nichols Roy Bible College kaba don ha Sohryngkham kam dei eh ban plie ïa ka bos kaba u la ai na ka Chief Minister Special Development Fund 2022-23 sha kane ka jaka ai jinghikai, hynrei kaba kongsan ka dei ka jingïadei ka jong u bad ka kolej.
Ïa kine ki kyntien u la pynpaw haba ai jingkren kum u kongsan ha shwa ban plie ïa ka bos jong kane ka Bible College kaba don ha Sohryngkham, East Khasi Hills District kaba la long mynta ka sngi ka 6 tarik Naitung, 2023. Ha kane ka sngi la synlang u MDC ka thaiñ, Bah Pynïaid Syiem uba dei u Chief Executive Member (CEM) ka KHADC ha jingïadonlang ki Pastor ka Balang U Blei (Meghalaya & Assam).
Ïa kane ka bos la mang haduh 29 lak tyngka ban pyndonkam da ka Nichols Roy Bible College kaba la ai nam ïa u Rev. JJM Nichols Roy uba dei u nongseng ïa ka Balang U Blei bad u dei uwei uba pynwandur ïa ka khyrnit ba hynriew ban bat ïa riti distur bad khyndew ka shyiap lyngba ki District Council.
Katkum ba paw ha ka jingthoh, ïa kane ka bos la prat lynti da u MDC ka Sohryngkham Bah Pynïaid Syiem uba bat mynta kum u CEM ka KHADC ban ai sngewbha khnang ba kane ka kolej kan ïoh pyndonkam katba ka sngewbit.
Haba ai jingkren ha kane ka jingïalang u Conrad u la pynpaw ka jingsngewkmen haba u la ïoh ban wan ïuhkjat ha kane ka kolej kaba la ai nam ïa u JJM Nichols Roy bad u don jingkyrmen ba un sa wan ban ïuhkjat biang.
Ha kajuh ka por u la pynbna ba un ai jingïarap haduh arphew san lak lyngba ka Chief Minister Special Development Fund ban tei ïa ka Convention Hall kum shi bynta ban ai jingmyntoi ïa ki nongrep, ki SHG bad kiwei lada ki kwah ban pynlong ki jaka ai jingïalang.
Ha kane ka jingïalang la ïoh ka jingkren na u Bah L. Roy uba dei u IAS ba la shongthait, la ïoh ka jingrwai kyrpang na ki samla pule kane ka kolej bad la pynïaid ïa ka jingïalang da u Rev. Dr. AC Moore uba dei ruh u President NBC Governing Body.
