Jowai, Naitung 07:
Ka lehniam Behdieñkhlam kaba la sdang ha ka Sngi Palei bad ka ban kut ha ka Sngi U Blei ka la ïai bteng ha ka Sngi Thohdieng da ki jingleh niam leh rukom bapher bapher ba la pyndep da u Doloi, u Langdoh, ka Langdoh ha ryngkat ki sangot ki maji bad ki Wasan.
Ha ka sngi ba bud jong ka Behdieñkhlam, ka jinglehniam ka la sdang naduh dang step da ka jingpynkyntang ïa ka ‘Syiem Aitnar’ ha kaba ki shakri niam naduh u Doloi, Pator, Langdoh, Sangot, ki riew rangbah bad ki Kñi na ki Kur bapher bapher ki la hiar sha ka ‘Syiem Aitnar’ ban pyndep ïa ka lehniam ha Duwan Kyntang bad ka adong niam ka ong ba naduh kane ka khyllipmat ym bit shuh ïa uno uno ne kano kano ka briew ba kin leh tam-ti tam-jat sha ki bynta ka Syiem Aitnar.
Ha ka jingïadei bad ka lehniam la ong ba katkum ki dak ki shin ba paw ka pyni ba ka lehniam kñia ainguh aidem ka long kaba miat ba bha ha kaba ki shakri niam bad ki khun ka Raij ki khmih lynti ba ka jingkyrkhu kan wan hapoh ka shnong ka Raij ryngkat bad ka pyrthei mariang kaba miat ba bha.
Hadien ba la pyndep ïa ka jingkñia Aitnar, ki Kmai Raij, kata ka Loompyrdi Ïongpiah, Loomiongkjam, Panaliar, Dulong, Tpeppale bad Loomkyrwiang ki la ïakynduh lang ha madan Mynkoi Pyrdi, Ïongpiah, bad hangne ki Kmai Raij ki la mih lang baroh shisyndon bad pynhiar ïa ka bom ka bhuri ha Biar ka Blai.
Hadien kane ki la mih sha Ïawmusiang ban leit rah ïa la ki jong ki dieng khlam na khlaw na Riatturiem. Ha ka por nohphai sngi baroh ki Kmai Raij ki la wanrah ïa la ki jong ki dieng khlam ha Ïawmusiang.
Ka Khonraij ne ka dong Chilliangraij ka la wanrah ïa ka khnong Blai bad la buh ha Loomsooïung. Na ka liang u President Seiñraij Jowai u la khot la wer ïa baroh ban wan lehkmen lang bad ka Seiñraij ha kane ka Behdieñkhlam.
