Shillong, Naitung 07:
Ka Sorkar Jylla lyngba ka tnat ka koit ka khiah ka dang pynkhreh mynta ban wanrah ïa ka mat treikam haba ïadei bad ka rukom buh bad pynkynriah ïa ki nongtrei ka tnat ka koit ka khiah kynthup ïa ki nurse kiba trei ha jaka ai jingsumar bapher bapher jong ka Sorkar.
Kane ka mat treikam kan ïarap ym tang ban pyndap ïa ka jingdonkam nongtrei ha ki jaka sumar, hynrei kan don ruh ka jingryngkat lang ha ka rukom sam bad buh ïa ki nongtrei kiba tbit ha ka kam ai jingsumar ha ki jaka sumar ha baroh kawei ka Jylla.
Ïa kane la ïakren ha ka jingïalang kaba la lum da u Myntri Rangbah Conrad K Sangma ha ryngkat ka Myntri ka tnat ka koit ka khiah Kong Ampareen Lyngdoh, lem bad u Managing Director ka National Health Mission bad u Principal Secretary ka tnat ka koit ka khiah ha ka Sngi Thohdieng.
La ong ba kane ka long ban pynkhlaiñ ïa ka jingdon ki nongtrei kiba trei ha ka liang ka koit ka khiah bad pynbha ïa ka jingai jingshakri ha ki jaka sumar kiba don sha jngai bha ha nongkyndong.
Ha kane ka jingïalang u Myntri Rangbah u la ïatai bad ka Myntri lem bad ki ophisar ïa ki buit kumno ban nang pynbha ïa ki lad jingsumar la ka dei ha ka liang ki jingtei jingshna bad ban ai ki jingsumar sha kiba dei ban ïoh myntoi.
Kawei na ki phang ba la ïatai ka long ban don ka jingai jingsumar ïa ki paidbah bad ka jingdon ki nongsumar kiba la pyntbit kyrpang hapoh ka tnat ai dawai. Ka jingthmu jong kane ka long ban don ka rukom treikam kaba khuid kaba shai bad ban pyntikna ba ki jingshakri ban ai ka jingsumar kyrpang na ka bynta kiba donkam ïa ki lad jingsumar.
Ka Sorkar Jylla ka la pyntreikam ruh ïa ka rukom thied ïa ki jingdonkam ha ka liang ka jingai jingsumar ha kaba ki jaka sumar ruh ki lah ban phah ïa ki jingdonkam jong ki sha ki bor ba dei khmih.
Haba i donkam ïa ka jingdonbynta lang ki shnong ki thaw ha ka liang ka koit ka khiah, u Myntri Rangbah u la ong ba donkam ban thaw ïa ka village health council. Kine ki village health council kin long ki rynsan ban shim ïa ki jingïakren hapdeng ki shnong bad ki briew ba kham halor ka tnat ka koit ka khiah ban pyntikna ba ki rai kiba shim ki long kiba ïahap bad ki jingnangnud ki paidbah.
Kumta u Conrad u pynpaw ka jingsngew skhem ba kine ki sienjam kiba la shim kin long kiba pynkylla ïa ka rukom ai jingshakri ha ka liang ka koit ka khiah ha Meghalaya.
