Shillong, Naitung 07:
Ka Khasi Students’ Union (KSU) ka la pynpaw ka jingsngewkhia halor ka jingshah shoh shah pynïap jong ki Khasi ha ki bar jylla na ka por sha ka por hapoh ka Jylla khamtam ha sor Shillong, kaba la syrtap da ki bar jylla nongwei suda.
Haba pynkynmaw ïa ki jingshah thombor ki Khasi ha ki bar jylla, u General Secretary ka seng, samla Donald V. Thabah ha ka kyrwoh u la ong, “Dang ha u 2020, ki bar jylla Bengali ki la pynïap dusmon ïa u Bah Lurshai Hynñiewta ha Pyntha Umdan kaba la pynsmiej ïa baroh ki paidbah Khasi kiba sah sha kito ki thaiñ.”
Ha kajuh ka por, u la ong ba ha u snem 2021 (ter-ter), ki bar jylla ki la pynïap dusmon ïa u Phershanroy Myrthong ha Golf Links bad bom ïap ruh ïa u Elias L. Nonglait ha Them Bijoy nalor ki jingshah shoh ki Khasi kum ha Nongmensong, ha Rilbong, ha 4th Furlong bad sha kiwei-kiwei ki jaka.
Utei u nongïalam u la pynkynmaw ruh ba dang shen 2 ngut ki samla Khasi kiba dang kamai jakpoh ha Khyndailad ki la shah bom shah tied da ki tiar pynmynsaw ha ki bar jylla kiba la shongshit khawiang.
“Ka KSU ka la ïoh jingtip ruh ba mynnin ka miet ka huri-hura ha Laitumkhrah ka mih namar ka jingjrong kti khlem daw ki bar jylla ïa ki khynnah Khasi. Kaba sngewphylla ka long haba ki CRPF ki la wan, ki ai jingïada pynban ïa kine ki bar jylla bad tied lathi naphang ïa ki Khasi. Halor kane ka jingjia mynnin, ka seng ka dang ïai lum shuh ki jingtip ban ïoh ïa ka jingshisha kaba la poi haduh uto u pud,” la ong u samla Thabah.
U la ong ruh ba kitei ki jingjia kiba na ka por sha ka por ki pynkynmaw ïa ka KSU ïa ki por kiba la leit kum ha ki phew snem 70, 80 bad 90 ha kaba ki bar jylla ki thom naphang ïa ki Khasi da ka jingthmu ba pynlong ïa ki Khasi ban phetwir noh na Shillong.
Ka KSU ka bthah ïa ki nongïalam Jaidbynriew jong ki bar jylla bapher-bapher ba ki dei ban tehlakam ïa ki briew jong ki, lym kumta ka seng kam banse ban shim biang da ki sienjam kumba ki nongïalam (ka seng) ki la shim ha kito ki por kum ka ‘Anti-Foreigners’ Movement’.
Shuh shuh u la bynrap, “Lada ka seng ka hap ban shim ïa kita ki sienjam, kine ki Jaidbynriew lem bad ka Sorkar kin hap ban bah-khlieh lada jia eiei kaba sngewsih. Ka seng ka kyntu ruh ïa baroh ki para Khasi ban long kiba la khreh namar kane ka jingleh ki bar jylla ka dei ka buit ba pyntreikam ïa ki jingthmu jong ki, kiba ki la pun naduh ki por mynshuwa.”
