Shillong, Naitung 07:
Ka MLA ka East-Shillong, Dr. M. Ampareen Lyngdoh ha ryngkat ka jingsynran lang u MDC, Bah Fantin J. Lakadong ha ka Sngi Thohdieng ka la leit mih sha thanat Laitumkhrah ban ïakren bad ki pulit halor ka jingshah thang jong kawei ka kali kaba la pynïeng ha katei ka jaka ha ka miet shiteng synñia jong ka 7 tarik mynta u bnai.
“Ka dang don ka jingtohkit na ka liang ki pulit ban wad ïa ka daw jong ka jingthang ïa kine ki kali ha thanat Laitumkhrah,” la ong ka Dr. Lyngdoh haba kren sha ki lad pathai khubor.
Haba pynpaw ka jingsngewsih halor kaei kaba la jia, ka la ong ba katkum ki jingtip na ki pulit, ka la don ka jingïamai hapdeng ki arliang mamla ha kawei na ki dong ha Laitumkhrah bad hadien kata, la wan poi sha thanat ban ujor ejahar halor ka jingbym shah ïaid ïa kawei ka kynhun na kawei ka lynti.
“Hynrei kane ka la jia noh ha kata ka rukom ha kaba 2 ne 3 ne 4 tylli ki kali (ba kynthup ïa ki 2 bad 4 shaka) ki la shah thang. Ngim dei ban shah ïa kane ba kan jia. Ka shnong Laitumkhrah ka dei ka shnong kaba tipbriew, tip aiñ bad ngim dei ban shah ïa kane,” ka la ong.
Ka jingwan jong ka MLA bad u MDC ha katei ka thanat ka long ban bthah ïa ki pulit ba ki dei ban shim ïa ka lynti katkum ki kyndon jong ka aiñ khnang ba kum katei ka jingjia kan ym jia shuh hadien-habud.
Haba ban jur ba ym dei ban bat ïa ka aiñ ha ki kti lajong khamtam ha ka por miet ynda la don ka jingïadih-ïabam, ka MLA ka la ong ba hap ban ujor mukotduma halor katei ka jingjia namar ym lah ban shah ïa ka jingbym burom ïa ka aiñ ban ïai jia hapoh ka konstitwensi.
Haba kylli, ka la ong, “Ngim donkam ban pynkylla mat sngewpher jaidbynriew ïa kane ka jingjia. Kam don eiei kaba kum kata. Ai ïa ki kynhun baroh ban wan ujor ïa ki ejahar bad ka tnad pulit kan sa tohkit bad wad ïa kata.”
“Kum ka MLA, nga ong ba ka dei por miet bad la ïakren hapdeng ka jingbym biang ka khlieh,” ka la ong.
Ha kawei pat ka liang ka la pynsngew ba ha ka jingshisha lada don kum kitei ki jingjia, dei ban phah peit bniah (Medical Test) lut ïa baroh kiba ïadon bynta la ka dei ka jingïashoh ne jingpynkheiñ aiñ, bad kim dei ban kyrngah lada hap phah peit bniah ïa ki.
“Wat shah ïa ka hamsaïa ba kan kham khraw ïa ka jingjia…mano ba shoh ïano, la u dei ne em uba phong ‘uniform’, ka bym lah long kata. Haba phi wan bun paid ban ïakren ïa kano-kano ka kam khamtam ha ka por miet, kam don ka jingshai,” ka la ong.
Shuh shuh ka Dr. Lyngdoh ka la bynrap ba ki pulit ki dang wad jingtip bad kin sa pynbiang ruh ïa ki kaiphod halor katei ka jingjia.
“Ngi dei ban peit ba ïa kane dei ban pynkut noh hangne, hynrei yn ym dei ban don uno-uno u ban long halor jong ka aiñ. Ai ba ka lynti jong ka jingtohkit kan pyni ïa ka jingjia mynnin,” la ong katei ka nongmihkhmat.
Kum ban shu kdew hangne, ha ka miet shiteng synñia jong ka 7 tarik mynta u bnai ka la don kawei ka jingjia shah thang kali ha thanat Laitumkhrah hadien ba ka la don ka jingkynnoh ïashoh hapdeng ki ar kynhun ha ka thaiñ Laitumkhrah.
