Shillong, Naitung:
Ka shlem treikam jong ka Deputy Commissioner, East Khasi Hills District, ha ka Sngi Palei ka la kyrpad ïa baroh ki paidbah kiba la dep shondur bad ka Megha Health Insurance Scheme ne Smart Card jong ka East Khasi Hills District ba kin pynïasoh ïa u nombor Aadhaar bad ka MHIS Card.
Ha u kyrwoh khubor, ka Deputy Commissioner, Kong RM Kurbah, ka la ong ba ka MHIS ka la sdang ha u snem 2013 bad naduh kato ka por, ka la ai jingmyntoi ïa ki paidbah jong ka district bad ka jylla hi baroh kawei da ka jngïarap ha kaban siew lang ïa ka bailut baisep haba leit shah sumar sukher ha ki hospital khamtam ïa ki briew kiba duk jong ka district.
Kane ka skhim mynta ka la ai jingïarap haduh T. 5,30,000 kawei-pa-kawei ka longïing bad ki don da ki hajar ki longïing kiba la ïoh jingmyntoi na kane ka skhim, la ong ka DC. Hynrei mynta kim lah shuh ban ïoh ïa ka jingmyntoi na ka skhim lada kim pynïasoh (link) ïa u Aadhaar bad ka MHIS Card.
Kumta ka Kong Kurbah ka la kyrpad ïa baroh kiba la don ïa ka Aadhaar Card bad ka MHIS ba kin ïa wan shakhmat ban pynïasoh ïa u Aadhaar bad ka MHIS (Smart Card) jong ki khnang ba kin ym duh ïa ki jingmyntoi jong ka skhim.
“Ngi don ka jingkitkhlieh ïa phi bad ka longïing longsem jong phi bad ngi kwah ban ïarap ïa phi khnang ba phi bad ki bahaïing jong phi, phin ïoh ïa ki jingmyntoi kiba dei ka hok. Phi lah ban leit ha ki shlem treikam jong ka Block ne ha ki CHC/PHC ba don hajan jong phi ban pynïasnoh ïa ka MHIS bad ka Aadhaar Card,” la ong ka DC.
