Jowai, Naitung 09:
Ki Saw sngi Lai ïa, ka lehniam Behdeiñkhlam – kaba ju pynlong man la u snem da ka Seiñraij Jowai ban kyrpad kyrpon ïa U Nongthaw U Nongbuh ba Un ai ka kyrkhu ka kyrdoh ban lait na ka khlam ka ngoh bad ban ïoh ïa u khaw u kba, ban dap biang u thiar bad ban beh ïa ka sniew ka smeh ha ka imlang ka sahlang ka la poi noh sha kaba kut ha ka Sngi U Blei ha Aitnar.
Da ki hajar ngut ki riewngeit Niamtre bad ki paidbah na kylleng ki la wan ban sakhi ïa kane ka jinglehniam.
Ki kynrem ki lyndan kiba la wan ban sakhi ki kynthup ïa u Lat ka jylla, u Phagu Chauhan, u Chief Justice ka Meghalaya High Court, u Justice Sanjib Banerjee, u Myntri Sorkar, u Bah Kyrmen Shylla bad u MLA ka VPP u Bah Adelbert Nongrum nalor u Deputy Commissioner, Superintendent of Police ka West Jaiñtia Hills District bad ki heh sorkar na ki tnad bapher bapher ka distrik.
Kane ka Behdeiñkhlam ba saw sngi lynter ka la ïaid beit ïaid ryntih hapoh ka jingpynïaid ki nongïalam kiba kynthup ïa u President, u Bah OR Shallam, General Secretary, u Bah Arwotki Sumer bad ki shakri niam naduh u Dolloi Elaka Jowai u Bah Puramon Kynjing, u khlieh jong ka niam, Sangot, Langdoh, bad kiwei kiwei kiba don bynta ban pyndep ïa ka niam ka rukom.
Ïa ka lehniam Behdeiñkhlam ha ka sngi pynkut la sdang da ka lehniam ‘Kynting Khnong’ ha ïing sah ka Langdoh bud pat sa ka ‘Bam Tyngkong’.
Hadien pat la pyndep sa ïa ka lehniam ‘Shoh Thyndai’ ban shoh ban dat ha man ki tnum ïing da ki Deiñkhlam katkum ka jingngeit ban beh ïa ki ksuid ki khrei, ka pang ka shitom bad ka sniew ka smeh baroh na ki ïing ki sem.
Ïa kine ki jinglehniam la pyndep da ki rangbah niam ka Seiñraij kiba kynthup ïa u Dolloi, Sangot, u Chutia, nalor u Pator, u Langdoh bad ki ’riew rangbah ka Raij.
Katba ha ka nohphai sngi la pyndep ïa ka bynta ba kongsan jong ka Behdeiñkhlam ha Aitnar ha ka pung ba kyntang, ha kaba hangne ki ’riew rangbah hapoh ka jingïalam u Pator ki la pynlong ïa ka nguh ka dem ha ka Syiem Aitnar.
Hadien nangta la bud pat sa ka jingwan poi ka ‘Khnong Blai’ ha kaba ki khun ka Niamtre ki la hiar ban shad ha kane ka pung kyntang.
Ki dong bapher bapher kynthup ïa ka dong Panaliar, Chilliangraij, Dulong, Loomkyrwiang, Loomïongkjam, Ïongpiah kynthup ruh ka Seng Khasi Kmie, Seiñ Raij Shillong, Seiñ Tylli Niamtre Ladthadlaboh, Seiñ Ummulong ki la wanrah ïa ki rong ki rup jong ki ha ryngkat ka khubor sha ki paidbah.
Mynta u snem ki don haduh 13 tylli ki rong ki rup kiba la wanrah sha Aitnar, bad hadien ba la wan poi lut ki rong ki rup, la wanrah sa ïa ka ‘Khnong Blai’.
Ha ka janmiet pat la pyndep ïa ka lehniam Datlawakor hapdeng u Langdoh uba ïeng na Pynthor Wah pyrshah ïa u Sangot Paswet uba ïeng na Pynthor Neng ha kaba la jop da u Langdoh bad katkum ka jingngeit niam ha une u snem u khaw u kba un bha sha ka Pynthor Wah.
