Shillong, Naitung:
Ka Sorkar Jylla ka la rai ba shen kan sa buh noh ïa ka Climate Museum-cum-Centre ha Upper Shillong.Haba pynbna ïa kane ha ka Sngi Palei, u Myntri Rangbah ka Jylla, Conrad K Sangma u la ïathuh ha ki lad pathai khubor ba ïa kane ka Centre yn sa pynïeng hapoh ka jaka jong ka tnat Khlaw kaba don markhap bad ka kshaid Elephant Falls.
“Kan dei ka Climate Museum-cum-Centre kaba ngin saiñdur ha ka ban pynlong kum ka jaka kaba ki samla pule ki lah ban wan bad ban lum jingtip bad khmih ïa ki rukom bapher bapher jong ka jingkylla ka suiñ bneng kiba jia hapoh ka thaiñ, ha ka Jylla, ha ka Ri bad kylleng ki Ri ka pyrthei,” u la ong.
“Kan dei ka jaka kaba ngin ai jinghikai ïa ki khynnah bad ha kajuh ka por ban pynlong ïa ki jingïasyllok. Kin don ki kamra shong jingïalang, ki jaka bapher bapher ban sah khnang ban lah pynlong ïa ki jingïalang kiba heh,” la ong u Conrad.
U Conrad u la ïathuh ruh “Ngi la tyrwa ba man u snem kan don ka jingïalang jong ka Regional Level ka thaiñ shatei lam-mihngi ba ngin ïakren man la u snem halor ki mat ba kongsan jong ka suiñ bneng bad kumno ki jylla bapher bapher kin lah ban ïatreilang”.
