Shillong, Naitung 09:
U MDC ka Mawphlang-Diengiei konstitwensi, Bah Lamphrang Blah uba dei ruh u Shongknor ka ïingdorbar Khasi Hills Autonomous District Council (KHADC) u la dep kyrpad ïa u Chief Executive Member (CEM) ba thymmai, Bah Pynïaid Syiem ba un pynbha biang ïa ka Khasi Heritage Village kaba don ha Mawphlang.
Kum ban shu pynkynmaw ïa ka Monolith Festival la pynlong khatduh ha u snem 2013 ha Khasi Heritage Village kaba don ha Mawphlang kum shi bynta ban khring ïa ki nongjngohkai pyrthei namar sha shiliang jong kane ka tamasa ka don ka ’law kyntang jong ka Hima Mawphlang. Hynrei haduh mynta ka KHADC kam shym lah shuh ban pynlong biang ïa kane ka tamasa pyni ïa ki riam bad shad tynrai Khasi.
Haba ïakren bad u Bah Lamphrang Blah u la ïathuh ba naduh ba long CEM u Bah Titos Chyne u la dep kyrpad bad mynta haba la long sa u Bah Pynïaid Syiem ruh u la dep kyrpad ban pynbha noh ïa ki ïing trep kiba la jot ha Khasi Heritage Village kaba don ha Mawphlang.
U la ong ruh ba dei ban pynlong biang ïa ka Monolith Festival kaba long shi bynta ban khring ïa ka kam jngohkai pyrthei ïa ka ’law kyntang bad ban pyni ïa ki riam bad shad tynrai na kylleng ki Hima Khasi.
Ha ka jingleit jurip u nonglum khubor ha kine ki sngi, ka Khasi Heritage Village ka la sdang ban kynjah namar ki la duna bha ki briew kiba wan kai pyngngad la ki dei na jylla ne nabar ka jylla. La sakhi ruh ba ki ïing trep ha kane ka jaka ki la sniew lut bad ym long shuh ban rung shapoh. Nangta ki ïing ba la tei da ka dewbilat ruh ki la kynjah bha naduh ba khlem pynlong shuh ïa ka Monolith Festival.
Kum ban shu pynkynmaw ïa kane ka Monolith Festival la mait lynti nyngkong da u CEM barim, Bah Pynshngaiñ N Syiem. Te mynta haba u la shimti kum u Deputy CEM ka KHADC kan don biang ka jingkyrmen ba kin pynlong ïa kane ka tamasa kaba la pynsangeh mynta la palat shiphew snem.
