Jowai, Naitung 09:
Ki khun ki hajar na Ri-lum Jaiñtia ki la ud ki la nam ïa la ka jingsngewdiaw jong ki halor ka jingbym biang ka ‘Roster System’ bad ka ‘Reservation Policy’ lyngba ka rong ka rup kaba la shna kyrpang ha Behdeiñkhlam.
Ïa kane ka rong ka rup la shna kyrpang da ki khun ka Niamtre Ïawmusiang, Jowai kaba la pynshon khmat lut ïa baroh mar syn wanrah ha Aitnar kaba long ka jaka kyntang ban pynkut ïa ka lehniam Behdeiñkhlam.
Nalor katei ka rong ka rup ba la shna da ki khun ka Niamtre Ïawmusiang, la don sa kiwei ki rong ki rup kiba la shna kyrpang ryngkat bad ka khubor sha ka pyrthei.
Ki khubor ba la pynsaphriang lyngba ki rong ki rup ki long ka thma pyrshah ïa u drok, jingdonkam ban pynneh pynsah ïa ki khlaw ki btap, ban pynneh pynsah ïa ka riti dustur, jingkynrei ka jingpang HIV, jingkyrni ha ki Mobile Phone bad kiwei kiwei.
Ki khun ka Niamtre Ïawmusiang ki la jied ïa ka mat ‘Roster System’ bad ka Reservation Policy kum ka khubor sha ka sorkar jylla bad ki khun ki hajar na Ri-lum Jaiñtia ruh ki kwah ka jingkylla bad jingpynbha ïa kine ki mat.
Ka rot jong ka Ïawmusiang ka la don ki khubor ha ka ktien nongwei kiba ong kumne, “I was born intelligent but the present Roster ruined me. Many deserving, candidates have been deprived their jobs by the existing policy. Rectify the roster anomalies or revamp the 1972 resolution. A non-discriminatory formula is acceptable to all categories in Meghalaya.”
Ha ka Khasi kine ki kyntien ki long kumne: ïa nga la kha kum u briew uba stad, hynrei kane ka Roster System kaba mynta ka la pynjot ïa nga. Kiba bun ki samla kiba dei hok ki la duh noh ïa ka kam ka jam namar jong ka Reservation Policy kaba mynta. Pynkylla ïa ki jingduna bad jingbymbiang ha ka Roster System lane pynkylla ïa ka Resolution halor ka Reservation Policy jong u snem 1972. Baroh kin pdiang lada don da ka jingbhah kam ka bym shah liang ïano-ïano.
