Shillong, Naitung 09:
Ki pulit ki la ïoh ban kem noh ïa 5 ngut ki briew kiba la shah kynnoh donkti ha ka jingïakajia kaba la jia ha ka miet shiteng synñia jong ka 7 tarik mynta u bnai. Kane ka jingjia ka la ïalam shaduh u pud ban shah thang kawei ka kali kaba la pynïeng ha thanat Laitumkhrah.
“Ki arliang mamla kiba ïakajia para ma ki, ki la shah kem,” la ong u S.P. (City), Bah Vivek Syiem ha ka Sngi Saitjaiñ.
Ha kajuh ka por, u la ïathuh ba ki don 5 ngut kiba la shah kem haba ïadei bad katei ka jingjia.
Ïa kitei 5 ngut la leit rah sha Shillong Civil Hospital na bynta ban phah peit bniah bad hadien kata sha ïingbishar.
Kum ban shu kdew hangne, ha ka miet shiteng synñia jong ka 7 tarik mynta u bnai ka la don kawei ka jingjia shah thang kali ha thanat Laitumkhrah hadien ba ka la don ka jingkynnoh ïashoh hapdeng ki ar kynhun ha ka thaiñ Laitumkhrah.
Na ka liang ka tnad pulit ka la pynshai ba ka jingjia kaba la jia ha ka miet shiteng synñia jong ka 7 tarik mynta u bnai ka dei namar ka jingïakajia hapdeng ki 2 kynhun kiba la shongshit.
