Shillong, Naitung 09:
Ki nongrep phan ne sohlah, bad ki nongrep kubi ki la pynpaw ka jingthrang ban pynduh jait noh ïa ka jingot kilo haba ki nongrep ki die ïa ki mar rep kumba la rai da ki bor ba dei khmih ïa ki ïew ki hat kynthup ha Ïewduh kaba dei ka ïew kaba heh tam ha nongbah Shillong kaba ki nongrep na kylleng ki ju leit rah ïa ki mar rep ban die sha ki nongthied.
Katkum ka jingïathuh ki nongrep, kiba na thaiñ Mawkynrew, ki la ong ba haduh mynta, ka jingot kilo ïa ki mar rep ka dang don bad kane ka ktah ïa ki nongrep kiba rep ïa u kubi, phan, sohsaw, motor bad kiwei kiwei.
Ki la ong ba lada kam don ka jingot kilo, kan long ka jingmyntoi namar ki mar rep ba la shah ot kilo kin long pynban ka jingïarap ïa ki ha ka bai kali, bad ka bai pynlut ha ka por ba thung ba tep.
Ki nongrep ki la ïathuh ba na ka shi byrni u kubi, ka jingot kilo ka long 2 kilo bad na ka shi byrni u phan, ka jingot kilo ka long 3 kilo.
Kumta ki nongrep ki la kyrpad ïa ka tnat rep ka Sorkar Jylla bad Hima Mylliem bad District Council ban peit ïa kane ka jingot kilo.
Ha kajuh ka por, ki nongrep ki la kyntu ruh ïa ka tnat rep ba kan pynpoi bun ïa ki symbai sha ki nongrep khnang ba kan long ka jingmyntoi ïa ki paid nongrep jong ka thaiñ Mawkynrew.
Nalorkata, ki la ai nuksa ruh ba ka thaiñ Mawlali, Thynroit, Mawber, Mawpyrshong ki dei kiba khlaiñ bha ban rep bad pynmih ïa u kubi, phan, sohsaw, bad kiwei kiwei ki mar rep.
