Tura, Naitung 09:
Ka Trinamool Congress (TMC) ha Ri-lum Garo ha ka Sngi U Blei ka la ther tyngeh ïa u Myntri Rangbah ka Jylla, Conrad K. Sangma uba la kam na ka por sha ka por ba ka pule-puthi ka dei ka mat kaba hakhmat eh jong ka Sorkar watla ka kyrdan jong ka Jylla ka ïai bteng ban hiar sha trai katkum ka Performance Grade Index (PGI) jong ka tnad pule-puthi ka Sorkar Pdeng.
“Ka long ka bym lah pdiang ba u Myntri Rangbah ka Jylla, u Conrad K. Sangma ban kam na ka por sha ka por ba ka pule-puthi ka dei ka mat kaba hakhmat eh jong ka Sorkar watla ka kyrdan jong ka Jylla ka ïai bteng ban hiar sha trai katkum ka Performance Grade Index (PGI) jong ka tnad pule-puthi ka Sorkar Pdeng. Kane ka kdew shai ba ka Sorkar MDA hapoh ka jingïalam ka NPP ka la pulom ban pynurlong ïa ki jingkular ban buh hakhmat eh ïa ka pule-puthi,” la ong u nongïalam ka seng samla ka TMC, u Richard Marak.
U Marak u la bynrap ba ka Sorkar MDA ka dei ban shim ka jingkitkhlieh halor ka jingbym leh eiei bad ka jingbym don mon ha ka ban pynbha ïa ka tnad pule-puthi – ha kajuh ka por ka bym lah pdiang ba ki khynnah pule hapoh ka Jylla ki mad jingeh namar ka jingbym kitkhia bad jingbym larkam ban pynbiang ïa ki lad jingpule kiba paka.
“Ngi dawa ba ka Sorkar ka dei ban leh eiei mardor ban khmih bniah ïa ki jingtynjuh ba mad da ka tnad pule-puthi. Kane ka kynthup ïa ka jingkyntiew pisa, ban pynbha ka jingai jinghikai bad jingkyrshan sha ki nonghikai, bad ban plie lad ïa ka jingïadon bynta lang jong ka imlang-shalang ha ka liang ka pule-puthi. Ka lawei ka Jylla jong ngi ka shong ha ka pule-puthi kaba paka kaba ngi pynbiang sha ki khynnah bad ka Sorkar ka dei ban pynurlong ïa ka kular ban pynlong ïa ka pule-puthi ka mat kaba hakhmat eh hapoh Meghalaya,” la bynrap u Marak.
