Shillong Naitung 09:
U Myntri Rangbah ka jylla u Conrad K Sangma ha ka sngi Saitjaiñ u la plie paidbah ïa ka Annex Building jong ka ïingbishar Meghalaya High Courts ha nongbah Shillong.
Ha kane ka sngi plie ïa kane ka building ba thymmai la ïadon lang ryngkat u Chief Justice ka Meghalaya High Court u Sanjib Banerjee, u Myntri ka tnat pule puthi u Rakkam Sangma bad ka Myntri ka tnat aiñ ka Kong Ampareen Lyngdoh.
Kane ka building kaba thymmai ka dei shi bynta jong ka jingpynïar ïa ka jingtreikam jong ka kashari bad la tei ïa katei ka building kaba thymmai ha ka jinglut jingsep kaba kot T.45 klur kaba don ïa ka auditorium, ki kamra na ka bynta ki nongïasaid aiñ bad kiwei ki kamra trei. Kane ka jingtei kaba thymmai ka long kaba donkam bha bad kan ai jingkyrshan ïa ka rukom treikam jong ka High Court.
Haba kren ha ka jingïalang plie, u Myntri Rangbah u Conrad K Sangma u la ai jingïaroh ïa ka jingshimkhia ban tei ïa ka kane ka building kaba thymmai bad u la ban jur ïa ka jingdonkam ban don ïa ki kashari kiba don ïa baroh ki jingdonkam katkum ka juk kaba mynta ban pynthikna ba yn lah ban ai ïa ka jingbishar hok kaba sted.
U la ïaroh ïa ka Meghalaya High Court ïa ka jingbat skhem ïa ka nongrim ha kaba ïadei bad ka jingbym shah liang, ka jingkhuid jingsuba bad ka jingai ka jingbishar kaba hok ïa baroh. U la pynpaw ruh ïa ki jingthmu jong ka sorkar na ka bynta ban kyntiew bad pynbiang ïa ki jingdonkam ha ka jylla baroh kawei bad kaba bun eh ka jingbhah tyngka ha kine ki snem kiba la leit ka dei ha ka liang ka pule puthi ban kyntiew bad pynbha ïa ki Lower Primary bad Upper Primary School jong ka sorkar bad kumjuh ban pynbiang ïa ki jingdonkam ha ki jingpule ha ki kyrdan kiba heh.
U la ïathuh ba ka sorkar jylla kala pynïaid shakhmat na ka bynta ban maramot, shna pynbha bad ban tei ïa palat 2500 tylli ki LP & UP School ha ki snem ban wan.
Ka jingthmu jong katei ka sienjam ka long ban kyntiew ïa ka pule puthi bad ban pynbiang ïa ki tiar ki tar katkum ka jingdonkam ki samla pule ha kylleng ka jylla Meghalaya. Ka sorkar ka don ïa ka thong ban pynthikna ba man la ki khynnah pule kin ïoh ïa ka lad ban pule ha ki jaka pule kiba paka kiba don ïa ki jingdonkam baroh.
U Chief Justice ka Meghalaya High Court, u Sanjib Banerjee, u la pynpaw ba kane ka Annex Building ka dei ka lynti kaba bha na ka bynta ban kyntiew ïa ka rukom treikam ka kashari ha baroh ki liang.
U la pynpaw ruh ba ka long kaba kongsan ban don ïa ka jinglong jingman kaba biang na ka bynta ki nongbishar, ki nongïasaid aiñ bad ki nongujor mukotduma ban pynthikna ba kan don ka jingsted ha ka ban ai ïa ka jingbishar kaba hok. Da ka jingdep tei ïa ka annex building, ka Meghalaya High Court ka thmu ban pynkhlaiñ ïa ka jingkular ka jongka ban batskhem ïa ka hok jong ki paidbah.
Ka sorkar kala dep ban ai ïa ka jingbhah kum shi bynta ban kyrshan ïa ka jingtei ïa ka annex building, kaba pyni ïa ka jingkular ban don ka jingkhlaiñ ha ka kam bishar synshar.
U Myntri Rangbah u la ai khublei ïa baroh kiba don bynta ha ka ban pyndep ïa ka jingtei ïa ka projek, kiba kynthup ïa ki architect, engineer bad ka kynhun kaba tei ïa ka building.
