Shillong, Naitung 09:
Ka United Democratic Party (UDP) ka lah ban sei da u General Secretary barim ka Khasi Students’ Union (KSU), Bah Auguster Jyrwa ban ïakhun ïa ka ilekshon MDC ka ban long ha u snem 2024 na Jaïaw constituency ha jaka u Bah Paul Lyngdoh hadien ba u la shah jied biang kum u MLA ka West Shillong ha kane ka ilekshon ba dang shu dep.
Katkum ki khubor ba la ïoh lum la ïathuh ba ki nongkyrshan ka UDP na West Shillong kiba la pynjop biang ïa u Bah Paul Lyngdoh ha kane ka ilekshon MLA ki pdiang ïa ka kyrteng u Bah Auguster Jyrwa ban ïakhun na ka tiket UDP na Jaïaw konstitwensi namar u la wan ban kyrshan ïa u Bah Paul shwa ka ilekshon MLA.
Kum ban shu pynkynmaw, u Bah Auguster Jyrwa u la ïakhun teng ïa ka ilekshon MDC na Jaïaw konstitwensi na ka tiket Congress ha u snem 2019, hynrei u khlem ïoh jingjop. Hadien ba u MLA barim, Bah M. Rapsang u la mih na Congress u leit ban pynïasoh sha ka NPP. Kumta ka kynhun u Bah Auguster ki khlem leit sha ka NPP, hynrei ki leit ai jingkyrshan ïa u Bah Paul Lyngdoh uba ïakhun na ka seng UDP bad rah syndon ïa ka jingjop.
Kane ka jingmih ka kyrteng u Bah Auguster Jyrwa ban ïakhun ïa ka ilekshon MDC ka dei hadien ba u Bah Paul Lyngdoh u la shah jied ban long kum u Myntri ha ka Sorkar Jylla hapoh ka jingïalam u Conrad K Sangma kum u Myntri Rangbah.
Kat haduh mynta ym pat don ki seng saiñ pyrthei kiba pynpaw ban sei kyrtong na Jaïaw konstitwensi, hynrei kiba la pynkhreh ban pynïeng kyrtong ki long tang ka Voice of the People Party (VPP) kaba la dep pynkhlaiñ ïa ki shnong.
