Shillong/Tura, Naitung 09:
Hadien ba kawei ka karkhana thang dewïong be-aiñ ha ka thaiñ Shallang ka la shah pynkhyllem ha ka Sngi Saitjaiñ ha ki bor distrik ka West Khasi Hills da kaba shu pyndonkam da ka tiar pynbthei, ki 46 tylli kiwei pat kiba kum kine kijuh ki karkhana ki lah ban ngat ha kaba kum kane hi ka apot.
Ka tyllong khubor na ka sorkar ka ïathuh ba ki don sa kumba 46 tylli ki karkhana thang dewïong be-aiñ kiba trei bad kin sa shah pynkhyllem ha kine ki sngi hashwa jong ka 20 tarik Naitung.
“Ki don 57 tylli ki karkhana thang dewïong ha Shallang, bad na kine, 47 tylli ki dei kiba treikam be-aiñ namar ki khlem ïoh satia ïa kino-kino ki jingbit ba kin treikam bad ym don satia ka kyrteng jong ki trai jong kita ki karkhana,” la ong ka tyllong khubor na ka sorkar.
Ïa ka rai ban pynkhyllem ïa ki karkhana thang dewïong be-aiñ la shim ha ka jingïalang kaba la long dang shen ha nongbah Shillong. Ïa kane ka jingïalang la pynlong da u Myntri Rangbah, u Conrad K. Sangma, ha ka jingdonlang kiwei pat ki heh sorkar. Ha ka jingshisha, u Conrad u la kwah ba ki bor sorkar kin pynkhyllem lem ïa kiba kum kine ki karkhana hashwa ka 10 tarik Naitung. Hynrei na ka daw jong ka jingkhim palat ka por, la buh ïa ka 20 tarik Naitung kum ka sngi khatduh ban pynkhyllem lut ïa kiba kum kine ki karkhana be-aiñ.
“Ngin sa sdang biang ha ka taïew ban wan bad ngin pynkhyllem lut katba ngi lah hashwa ban kut ka sngi ba la buh,” la bynrap ka tyllong khubor.
Shuh shuh ka tyllong khubor ka ïathuh ba kiba bun na kitei ki 47 tylli ki karkhana thang dewïong be-aiñ, kiba long trai ki dei ki briew kiba shong ha Assam bad ha kiwei pat ki bynta jong ka India. Hynrei ki don ruh na kine ki karkhana kiba la long trai da ki briew kiba shong ba sah ha Rilum Garo, la ong ka tyllong khubor.
Nalorkata, ka tyllong khubor ka ïathuh ba ha ka shi sngi, kumba 200 tylli ki trok kiba kit ïa u dewïong ba la thang (Coke) ki ju ïaid ban leit sha kiba bun ki bynta jong ka Assam lyngba ki surok na Khasi Hills bad Garo Hills.
“Ka long shisha kaba lyngngoh ba ym shym la don satia kiba la pynsangeh ïa kitei ki karkhana be-aiñ ha ka por ba ki la sdang ban treikam,” la ong ka tyllong khubor.
Ka jingmih jong kitei ki karkhana ka la sdang nyngkong ha u snem 2017 ha ka thaiñ Shallang. Kiba la treikam nyngkong ki dei kiba la ïoh jingbit bad ki don ïa kit ki sla kiba biang. Hynrei kham hadien, ki la wan sa kiwei pat kiba la shu pynïeng bad pyntreikam kumto ïa kiba kum kine kijuh ki karkhana khlem da ïoh jingbit nango-nango, la bynrap ka tyllong khubor.
