Jowai, Naitung:
Ka Jaiñtia Students’ Union (JSU) ka dap da ka jinglyngngoh ha kaba ïadei bad ka jingshna ïa ki surok ha kylleng ki jaka hapoh ka jylla khamtam bad ka surok NH 40 E ba dang shu dep shna naduh na Nongtalang sha Dawki ba la ïoh jingïarap ym duna ïa ka 43 klur 70 lak ba la bei pisa da ka sorkar India.
Kane ka surok ka la long biang kumjuh kumba ju long ha ka por ba sniew ha u snem ba la dep, la ong ka JSU bad bynrap ba kane ka surok kam biang satia ki nala um narud surok bad ka rukom pyntrei kam da biang.
Kumta ka JSU ka dawa na ka tnat PWD ban pynbor ïa ka kompeni ba trei ïa kane ka surok ba ki dei ban pyntrei biang bad ban pynbiang ruh ïa ki nala um khnang ba ka um ha ka por slap kan ym tuid sha surok namar kane kan khlong lut ïa ka rong surok.
Nalor kata, ka JSU ka pyrshah jur lada ka kompeni kan siang surok ha ka por slap bad dei ban siang ha ka por ba shit ka suiñ bneng ban lait na ka jingsniew khah-khah ka surok.
