Nongstoiñ, Naitung 09:
Ki bor distrik ka West Khasi Hills ha ka Sngi Saitjaiñ ki la pynpra noh phom ïa kawei ka karkhana thang dewïong beaiñ da kaba shu pynbthei ïa ka.
Kane ka karkhana ka dei kaba la treikam beaiñ ha kawei na ki jaka ha ka thaiñ Shallang khlem ki kot ki sla kiba biang.
Ka tyllong khubor na ki pulit ka ïathuh ba ha u Nohprah 2022 na ka liang ki bor distrik jong ka West Khasi Hills ki la dep ban pynpra malu-mala ïa katei ka karkhana thang dewïong, bad mynta pat ka dei ka jingpynpra phom da ki tiar bthei ïa ki jaka thang dewïong.
Shuh shuh la ïathuh la ïathuh ruh ba katei ka jingpynpra ïa kiba kum kitei ki karkhana thang dewïong be-aiñ kan dang ïai bteng ha kine ki sngi.
Lah ban kdew ba ha ka 26 tarik Jylliew, 2023 ki pulit ka West Khasi Hills ki la ïoh ban kem noh ïa ki saw ngut ki briew ïa kiba la suba jur ba ki dei ki trai ban pynïaid be-aiñ ïa ki karkhana thang dewïong ha thaiñ Shallang.
Kitei ki saw ngut kiba la shah kem ki dei kiba la tip kyrteng kum u Ashish Arya (32 snem) uba na Basisthapur Bye-Lane No 3, Guwahati, Kamrup, Assam, u Khrawbok Rongrin, na Sohbar A, Shallang, u Hopeful Nongtdu, uba na ka shnong Rymbai Synrang Shahkhain, East Jaiñtia Hills, bad u Yaman Bansal (28 snem), uba na Beltola Tiniali, Guwahati, Assam.
