Sawa biang ka sur dawa distrik, yn buddien ka SDDF halor ka kular u CM

Shillong, Naitung 09:

Ka Sohra District Demand Forum (SDDF) ha ka Sngi Saitjaiñ ka la rai ban pynbor ïa ka Sorkar ban kyntiew kyrdan noh ïa ka Sohra Civil Sub-Division sha ka distrik.

Ka jingïalang kaba la long ha shlem treikam u Syiem ka Hima Sohra ha katei ka sngi, ka la shim ïa ka rai ban pynkynmaw biang ïa u Myntri Rangbah ka Jylla, u Conrad K. Sangma haba ïadei bad ka jingkular kaba u la khlei ha ka 5 tarik u Kyllalyngkot mynta u snem ba shen katei ka jingangnud kan sa urlong bad ka nongbah (headquarter) jong ka distrik kan dei ha Sohra.

Hadien ka jingïalang, ka rai kaba mih ka long ba ka SDDF kan dawa na ka Sorkar ban kyntiew kyrdan noh ïa ka Sohra Civil Sub-Division ne ka Sohra bad Shella konstitwensi sha ka distrik.

Nalor ki nongshong shnong bad ki khlieh nongïalam shnong ka Sohra bad Shella, kiwei-kiwei kiba la don lang ha katei ka sngi ki kynthup ïa u MLA ka Sohra, Bah Gavin Miguel Mylliem, MLA ka Shella, Bah Balajied Synrem bad MDC ka Sohra, Bah Titosstarwell Chyne.

Ka jingïalang ka la rai ruh ba ka SDDF kan buddien halor ka jingkular jong u Myntri Rangbah ka Jylla kaba u la khlei ha ka 5 tarik u Kyllalyngkot.

Haba kren ha ka jingïalang, u MLA ka Sohra u la ban jur halor ka jingdonkam ban phiah noh ïa ka East Khasi Hills District namar yn ym lah ban khmih na kawei ka bor pynïaid naba ka jingbun paid ka la nang kiew na ka por sha ka por.

U la ïathuh ruh ba ha ka por ba ki dkhot jong ka SDDF ki la wan ïakynduh ïa u, u la ong sha ki ba kum u nongmihkhmat u don ha ka kyrdan kaba kham pher namar ïa ka Sohra konstitwensi la phiah ha ki 3 tylli ki bor pynïaid – don katto-katne kiba hap hapoh ka Sohra Civil Sub-Division, katto-katne hapoh ka Pynursla Civil Sub-Division bad kawei pat hapoh East Khasi District.

U MLA u la ong ruh ba ïa mynta, ki don 18 tylli ki shnong kiba hap hapoh Pynursla Civil Sub-Division bad kawei pat shnong hapoh ka East Khasi Hills District.

Ha kajuh ka por, u la ong ba hapoh ka Sohra Civil Sub-Division ki don 211 tylli ki shnong kiba hap hapoh Sohra bad Shella konstitwensi.

Na ka liang u Bah Mylliem u la ong ba ha shuwa ban leit sha ka Sorkar ban dawa ïa ka Sohra District, ka long kaba donkam ban wanrah ka jingïamynjur lang hapdeng ki khlieh nongsynshar shnong jong ka thaiñ.

U la maham ruh ïa ki nongshong shnong ba kim dei ban don ïa ka jingmut ba ynda la pynbna ban ai distrik ïa ka Sohra, yn don ki lad ai kam ai jam na bynta ki samla.

Utei u nongmihkhmat u la ong ba ka thong kaba hakhmat eh ban thaw distrik thymmai ka long ban pynïajan ïa ka synshar-khadar sha ki paidbah.

Ha kawei ka liang, u MLA ka Shella, u la ong ba lada kyntiew kyrdan distrik ïa ka Sohra, kiba bun na ki tnad treikam ki la don lypa.

Kumjuh u MDC ka Sohra, u la ong ba dei ha ka por jong ka Sorkar MDA – 1.0, ha ka por ba u Dr. Donkupar Roy (Bam Kwai ha Dwar U Blei) u dang long MLA (Shella) ba ka Sohra ka la jan kiew kyrdan sha ka distrik.

U la ong ruh ba hadien ka jingkhlad noh jong u Dr. Roy, ym shym la buddien shuh halor katei ka mat.

U la pynsngew ruh ba ha ka por ba la kyntiew kyrdan distrik ïa ka Mairang ha u 2021, ma u lem bad u Bah Synrem ki la ïakynduh ïa u Myntri Rangbah uba la ong ba ki don ki jingeh ha ka liang ka jinglong-jingman jong ka jaka.

U Bah Chyne u la kdew ba nalor ka jingthaw ïa ka Sohra distrik, ki nongshong shnong ki dei ban phai khmat ruh sha ka mat halor ka ïoh ka kot jong ka thaiñ bad ki lad ki lynti ha ka liang ïoh kam ïoh jam.

U la ong ruh ba ki briew hapoh ka thaiñ ki sngewkhia halor ka jinglong-jingman ka Mawmluh Cherra Cement Company (MCCL).

Kumta u la kyntu ïa ka SDDF ban shimkhia halor mat haba ïadei bad ban kyntiew ïa ka ïoh ka kot jong ka thaiñ.

Dang shen, ka SDDF ka la ïoh ïa ki nongkitkam thymmai ha kaba u Syiem ka Hima Sohra, Pa’iem Freeman Sing Syiem u la shah thung kum u Chairman, katba u Bah Banlam Lyngdoh kum u Secretary.

Shuh shuh u Bah Atiar Syiemlieh bad Bah Alan West Kharkongor ki la shah jied kum ki nongaibuit jong ka SDDF.