Shillong, Naitung 09:
Ka Khun Hynñiewtrep National Awakening Movement (KHNAM) ka dei tang maka kaba la phah jingthoh haba ïadei bad ka jingpynkylla ïa ka Reservation Policy bad kane ka seng ka la pynpaw ka jinglyngngoh ïa ka jingkren ka Myntri Sorkar ka Kong Ampareen Lyngdoh kaba la ong ba ym pat don ki seng saiñ pyrthei kiba phah jingthoh haduh mynta.
Ha ka kyrwoh ka KHNAM lyngba u Working President u Bah Thomas Passah u la ong ba ka jingïalang jong ki seng saiñ pyrthei halor ka Reservation Policy kaba la long ha ka 31 tarik Jymmang, 2023 ha Main Secretariat la shim ïa ka rai baroh ki seng saiñ pyrthei ki dei ban phah jingthoh ha ryngkat ki jingpynshong nongrim hapoh ka 15 sngi.
Kumta na ka liang ka KHNAM ka la dep phah da ka jingthoh ha ryngkat ki jingbatai ban pynshong nongrim ïa ki bynta kiba ïadei bad ka Reservation Policy ha ka 31 tarik Jymmang, 2023.
Ka KHNAM ka la ong ba ka jingbym phah jong ki seng saiñ pyrthei ka long kum ka jingpynkheiñ ïa ka rai kaba la shim ha ka 31 tarik Jymmang.
Ka la ong ba ki seng saiñ pyrthei naduh ka KHNAM, UDP, HSPDP, VPP bad INC ki la pynpaw haba ïadei bad ka jingdonkam ban peit biang ïa ka Reservation Policy jong u snem 1972, hynrei kaei kaba paw ka long ba lehse, namar ba kane ka mat kam don ha surok, baroh ki la shim shuti noh na kane ka mat kaba kongsan bad kaba wanrah ka jingkylli la ka don shisha ka jingsngewkhia halor kane ka mat.
U Bah Thomas u la ong ba ha ka jingïalang jong baroh ki seng saiñ pyrthei, la dep ban pynpaw ba ka Expert Committee kan long tang ka buit ban pynslem ban leh ïa ka jingpynbeit halor ka Reservation Policy. Kane ka paw ba ka jingartatien ka long kaba shisha namar haduh mynta naduh ka 31 tarik Jymmang ki kam ki dang ïaid suki kum ka mattah.
Ka KHNAM ka la ong ba na ka por sha ka por la pynpaw ba ka jingpyntreikam ka la roster system ka dei da kaba sdang na shadien bad ka Sorkar ka la pyrshang ban ïalam bakla ïa ki seng saiñ pyrthei bad ki paidbah.
Ka KHNAM ka la ong ba ka jingmih ka jingpynbna ha ka jingthungkam pulit la ïohi ba 41.63% (420) dei ki Khasi-Jaiñtia kiba shahjied bad 46.18% (466) dei ki Garo kiba shahjied kaba pyni ba kane ruh ka ïaid na shadien ha jingpyntreikam ïa ka Roster System, bad ka OM jong ka 14 tarik Jylliew 2023 ka dei ka roster system kaba don bad ki kam kiba sahteng namarba ïa ki jingkheiñ la lum naduh u snem 1972.
Ka KHNAM ka la pynpaw ka jinglyngngoh ba katkum jubab ha ka RTI, kaba ïohpdiang na ka tnat Personnel ka Sorkar Meghalaya ha ka 5 tarik Naitung, 2023 la pyntip ba ym don ki tnat treikam kiba don jingkheiñ lyngba ka roster register.
“Kumno ka tnat treikam ka Sorkar kan wanrah ïa ka rukom treikam halor ka Roster System khlem da buh ïa ka roster register. Ka Sorkar kam jubab haba kylli naduh uno u bnai bad snem ka OM jong ka 14 tarik Jylliew 2023 kan sdang. Ka paw ba ki paidbah ka Jylla Meghalaya ki shah bud ha ki seng saiñ pyrthei haba ïadei bad ka jingpynkylla ïa ka RP 1972 bad ïa ka Roster System. Ngin tih bniah naduh tynrai ban wad ïa ki buit and jingleh buit tuh ka Sorkar tang ban pynbeit ïa baroh,” la ong u Bah Thomas Passah.
