Nongstoiñ, Naitung 10:
Ki bor distrik jong ka West Khasi Hills ki la ïai bteng ban pynpra noh ïa ki karkhana thang dewïong be-aiñ da kaba pynbthei ha ka thaiñ Shallang, West Khasi Hills.
Katkum ka tyllong khubor ba la ïoh lum la ong ba katei ka jingleit ban pynpra ka la bteng ruh ha ka 10 tarik u Naitung, 2023 ïa ki lai tylli ki karkhana thang dewïong da kaba shu pynbthei.
Lah ban kdew ba ha ka 8 tarik u Naitung 2023, ki bor distrik ka West Khasi Hills ki la pynpra phom ïa kawei ka karkhana thang dewïong be-aiñ da kaba shu pynbthei. Kine ki karkhana ki dei kiba la shu pynïeng bad trei kam be-aiñ ha kawei na ki jaka ha ka thaiñ Shallang khlem ki kot ki sla kiba biang.
Shuh shuh ka tyllong khubor na ki bor distrik la ïathuh ruh ba katkum ka kaiphod ki don kumba 57 tylli ki karkhana thang dewïong be-aiñ hapoh ka thaiñ Shallang bad saw tylli ki dei kiba la biang ki kot ki sla. Ka hukum ban pynpra ïa kitei ki karkhana ka la pynmih naduh u Rymphang, 2023 bad la buh por 30 sngi naduh ka 8 tarik u Naitung, 2023 ban pyndep ïa katei ka kam.
Ka khubor na ki bor distrik ka ong ruh ba mynshuwa ha ka jingleit khynra, ym shym la lap ba kitei ki karkhana kin don ïa ki kot ki sla kiba biang. Hynrei, lada ki wan ban ai (submit) yn sa eksamin shwa ïa ki bad lada jia ba kim wan ai, ki lah ban shah pynpra noh.
