Shillong, Naitung 10:
Ki nongtrei ASHA kiba don hapoh ka shatri jong ka Meghalaya Asha Workers Union (MAWU) ha ka Lah Sngi U Blei ki la leit ban ïakynduh ïa ka Myntri ka tnad ka koit ka khiah ka Sorkar Jylla, ka Dr Mazel Ampareen Lyngdoh ban dawa ba ka sorkar ka dei ban khmih halor ka jingdawa ka kynhun kata ban siew noh da ka dor bylla sngi khnang ba kan long ka lad jingïarap ïa ki ba kin lah ban pyndap pynbiang ïa la ka ïing ka sem.
Haba kren sha ki lad pathai khubor, ka nongaiktien jong ka kynhun, ka Kong Soni Kharjana ka la ong ba ka kynhun ka la dawa kumba lai tylli ki jingdawa kaba kynthup ïa ka jingdawa ba dei ban kheiñ noh ïa ki Asha kum ki ‘Mininmum Wages’ lane ban siew dor sngi noh ïa ki ym shuh T.2,000 shi bnai kumba ju long. Ka ba-ar ka long ba ki dei ban ïoh ïa ka jingsumar kaba pura na ka MHIS bad kaba lai ka dei na ka bynta ban ïarap lane ban ai ka kynja jingpynskhem ïa ki nongtrei Asha na ka jingshah beh kam ha ki rangbah shnong. Ka Kong Kharjana ka la ïathuh ba hadien ba ka la ïakynduh ïa katei ka Myntri, katei ka Myntri ka la ai ka jingpyntikna ba ki nongtrei Asha kin ïoh ka jingsumar ei kaba 100% na ka MHIS bad ka Myntri ka la ong ruh ba ka tnad kan sa buh noh da ka Grievances Community ka ban khmih bad peitngor ïa ka jingshah weng kam jong ki nongtrei Asha.
Ha kaba ïadei bad ka jingdawa jong ka kynhun ban shah siew noh da ka dor bai sngi, ka Kong Kharjana ka la ong ba ka jingïoh kaba tang T. 2,000 ka long ka jingduhnong kaba khraw ïa ki Asha. Kum ki nongtrei Asha ban im tang T.2,000 kim lah satia ban im khamtam lei lei kiba bun na ki nongtrei Asha ki dei kiba bsa hi ïa la ka jong ka ïing ka sem.
“Ngi dawa na ka sorkar ba kan ïarap ïa ki Asha bad ba kan kheiñ ïa ki kum ki Minmum Wages ba kin im bai sngi noh”, la ong ka Kong Kharjana.
Na ka liang ka Myntri ka la ong ba kan sa shong ïa ka jingïalang bad u Myntri Rangbah ka jylla, u Conrad K Sangma ban ïakren sani bha halor kane ka jingdawa jong ki Asha. Ka Myntri ka la buh por ruh ïa ki nongtrei Asha ba kin sa wan mih biang hadien 10 sngi ba kan ai ïa jingrai halor kane la ka sorkar ka pdiang ne kam pdiang ïa ka jingdawa jong ki ban shah pynrung ha kata ka Minimum Wage ba kin shah siew noh ha ka dor sngi.
