Mairang, Naitung 10:
Kum shi bynta jong ka jingrakhe ïa ka sngi kyrpang jong ki nongri dohkha kaba la tip kum ka ‘National Fish Farmers Day’, ka tnat Fisheries jong ka Sorkar Pdeng, ka la pynlong ïa ka Virtual prokram ha ka Lah Sngi U Blei na ka bynta ki jylla bapher bapher jong ka Ri India ha kaba la ïoh ban plie da u Myntri ka Sorkar Pdeng ka tnat Fisheries, Animal Husbandry bad Dairying u Parshottam Rupala ïa ki projek bapher bapher kiba ïadei bad ka kam ri dohkha.
Ha kane ka prokram, ha Mairang la ïoh ban plie ïa kawei na ki Fish Processing Unit jong ka seng treilang Y Kharsyntiew SHG ha Umwiehsup, Mairang kaba la bei pisa na ka skhim Pradhan Mantri Matsya Sampada Yojana (PMMSY) na ka bynta u snem 2021-2022 bad ïa kaba la pyntreikam da ka ophis jong u Superintendent of Fisheries, West Khasi Hills District. Ha ka prokram ha Mairang, la sakhi ïa ka jingïashim bynta jong u Superintendent of Fisheries ka West Khasi Hills District, Nongstoiñ, u Bah A Laloo lem bad kiwei ki nongtrei ka tnat Fishery, u Syiem Khynnah jong ka Hima Nongkhlaw, u Pa’iem KM Syiemlieh, ki nongïalam shnong lem bad ki paidbah ka thaiñ. Ha kane ka Fish Processing Unit lyngba ki kor ki bor katkum kane ka juk kaba mynta yn lah ban pynmih tungtap ki ban pynïaid ha ki ïew ki hat bapher bapher ha ka jylla hi baroh kawei.
Ka jingplie ïa kane ka shlem pynmih tungtap ka long shi bynta na ka jingpyrshang jong ka sorkar ban kyntiew shuh shuh ïa ka ïoh ka kot jong ki nongshong shnong kiba ïa don bynta bad ka kam ri bad die dohkha ne kino kino ki mar bam ba lah ban pynnih na ka dohkha. Nangta la kyrmen ruh kiba kum kine ki jait skhim kin ïarap shuh shuh ban ai kam ai jam ïa ki nongshong shnong kiba don ïa ka bynta kaba khraw ban kyntiew ïa ka ïoh ka kot jong ka ri bad ka jylla.
