Jowai, Naitung 10:
U Bah Finelyness Bareh uba dei u Executive Member ba khmih ïa ka tnat saiñ Hima-Sima ka Jaiñtia Hills Autonomous District Council (JHADC) ha ka Dorbar Lyiur ka council kaba long ha ka Lah Sngi U Blei mynta ka taïew u la ong ba ka shnong Khanduli ka hap hapoh u pud u sam jong ka council.
Haba jubab ïa ka jingkylli ba la wanrah da u Bah Andrew Shullai MDC ka Liang Pyrshah, u Bah Finelyness u la ong “Ka shnong Khanduli ka hap hapoh u pud u sam jong ka council bad ka hap hapoh ka Elaka Nongjngi bad ka don la u jong u waheh shnong ba ithuh da ka JHADC.”
Ha kaba ïadei bad ka khyrdop khrong khajna ka Karbi Anglong Autonomous Council (KAAC) ha Khanduli, u Bah Finelyness u la ong ba ka council ka la ïoh jingtip halor kane ka jingïakajia, hynrei namar ba la ïaid ka jingpynbeit pud ka sorkar Meghalaya bad Assam ym pat lah ban shim kano kano rai ba kyrkieh.
U la bynrap ba ki ar ngut ki Myntri Rangbah kin sa jurip shen ïa kane ka jaka khappud ha ka 15 tarik Naitung namar ka jingkynad ki ar jaidbynriew Pnar bad Karbi.
