Nongstoiñ, Naitung 10:
Ka jingsngap mynthi jong ka sorkar Meghalaya bad ka kompeni ha kaba ïadei bad ka Kynshi Hydel Electricity Power Project, kawei na ki projek ban pynmih bording, mynta la 11 snem ka la pynlong ka jinglyngngoh haduh katta katta ïa ki trai khyndew.
Halor katei ka projek, ka Synjuk Trai Khyndew Warsanlyngdoh Sangriang Mawpun Area lyngba u Bah Roshen Myrthong, Vice President u la ïathuh ba ïa kane ka projek kaba la wan ban jurip da ka kompeni Brahmaputra Board mynshuwa bad ka la pyntip ba ka don kumba 450 mega Watt.
La ong ruh ba hadien kane, ha u snem 2007 ka sorkar Meghalaya ka la aiti bad ai NOC sha ka Athena Company ïa kane ka projek bad la dep ruh ban ïateh ïa ka soskular. Hadien kane la pyndep ruh ïa ka DPR, bad la leh ïa ka jingjurip ha u snem 2010 bad la pyndep ha u 2012. Hynrei kaba lyngngoh ka long ba la 11 snem kynthih haduh mynta ka sorkar Meghalaya bad kane ka kompeni ki shu sngap khlem leh eiei bad kane ka la pynlyngngoh haduh katta katta ïa ki trai jaka.
Na ka liang ka synjuk ka la pynpaw ruh ba katkum ka jingsngewthuh, kane ka projek kan nym ïap lane duh noh, hynrei ka don ka jingbuhrieh jongno-re-jongno. Kumta halor kane ka projek kum ki trai khyndew kin sa leit ban ïakynduh ïa ki briew ka sorkar ban budien ïa kane ka kam. Kum ki trai jaka ki kwah ruh ban ïoh ïa ka jingshai kdar bad ïa ki daw kaba pynlong ban pynsuki ïa kane ka projek.
