Shillong, Naitung 10:

Ka District Magistrate ka East Khasi Hills, Kong R.M. Kurbah ka la pynmih ïa ka hukum ba baroh ki dukan ha kylleng ka Sor Shillong kim dei shuh ban plie hadien ka 10 baje mynmiet.

Kane kan kynthup ïa ki dukan die jingdie, dukan bam, bad kiwei-kiwei ki kam khaïi ha kylleng ka Sor Shillong.

Ha kajuh ka por, yn ym shah dih ïa kino-kino ki jingdih pynbuaid ne ban ïadon bynta ha kino-kino ki kam be-aiñ hapoh ki kali.

Kumjuh, ym shah ban pynheh jingtem hajan ki shlem jingpule ne jaka mane blei, jaka sumar nalor ki jaka sah briew khamtam hadien ka 10 baje mynmiet.

“Kano-kano ka jingpynkheiñ ïa kane ka hukum kan khring ïa ki jingpynshitom hapoh ka Section 188 jong ka IPC,” ong ka hukum na ka Kong Kurbah

Kane ka hukum kan treikam naduh ka 12 tarik mynta u bnai bad kan bteng tad ynda pynbna da kumwei pat.

Kane ka hukum ka la kdew ruh ba ki la don ki jingjia bapher-bapher ha kylleng ka Sor Shillong, ha kawei ka liang kiba la ïalam sha ka jingthut ha ka shong suk shong shngaiñ khamtam ha ka por mynmiet bad ha kaba kine ki jingjia ki lah ban pynthut bad buh jingma ïa ki nongleit nongwan ba man ka sngi kumjuh ïa ka jingim jong u paidbah babun balang.

Shuh shuh ka la bynrap ba ka la donkam ban shim ïa ki sienjam ban khang lad ha ka ban pyntikna ïa ka jingïada bad jingshngaiñ jong ki paidbah bad ban pynneh-pynsah ïa ka suk ka saiñ hapoh ka nongbah.

Kum ban shu kdew hangne, ha ka miet shiteng synñia jong ka 7 tarik mynta u bnai ka la don kawei ka jingjia shah thang kali ha thanad Laitumkhrah hadien ba ka la don ka jingkynnoh ïashoh hapdeng ki ar kynhun ha ka thaiñ Laitumkhrah.

Na ka liang ki pulit ki la kem noh ïa 5 ngut ki briew kiba la shah kynnoh donkti ha katei ka jingjia.