Ampati, Naitung:
Ka ‘Block Convention’ kaba nyngkong eh halor ka Meghalaya Early Childhood Development (ECD) Mission ka la long ha South West Garo Hills – u mawjam uba kongsan ha ka ban pynbha ïa ka bit ka biang jong ka imlang-sahlang.
Katei ka jingïalang ka la pynleit jingmut ban khmih bniah ïa ki mat ba kongsan kum ka jingïap jong ki khyllung ba dang shu kha bad ban pynkhlaiñ ïa ka jingïadei bad kiwei-kiwei ki tnad treikam, ban pyntikna ïa ka jingïashim bynta jong ka imlang-sahlang, ka jingïatreilang bad ki tnad trekam ha ka ban pyntreikam ïa kane.
Ïa katei ka jingïalang la pynlong da ka ophis Deputy Commissioner, South West Garo Hills Deputy Commissioner lem bad ka ophis BDO, Betasing C&RD Block, ka kynhun ka Jylla jong ka ECDM, ki ‘riew shemphang bad ki nongai jinghikai na ki tnad treikam bapher-bapher ha Ampati ha ka Sngi Saitjaiñ.
Ka ECD Mission jong ka Sorkar Jylla ka thmu ban shimkhia ïa ki mat haba ïadei bad ki jingkylla ha ka roi ka par da kaba pynbiang ïa ka lad ka lynti lyngba ki sienjam haba ïadei bad ka roi ka par ha ka jingmut jingpyrkhat ki khynnah naduh dang kha haduh 8 snem ka rta.
Ka ADB ka la pynbiang ïa ka jingkyrshan pisa na bynta ka Mission kaba la pynithuh ïa 15 tylli ki Block lyngba ka jingpynbeit ban pyntikna ïa ka jingsam ba mar katjuh ïa ki jingdon-jingem bad jingmyntoi ha kylleng ka Jylla.
U Deputy Commissioner, u R.P. Marak haba sdang ïa ka jingïalang u la ïathuh ba ki don 6 ngut ki khyllung ba dang shu kha kiba la khlad ha kine ki 6 bnai ba la leit.
Watla kane ka long ka mat ka ban hap shimkhia, ha kawei ka liang u la ong pat ba ym shym la don kano-kano ka longkmie armet kaba la khlad noh ha kitei ki 6 bnai.
U Marak u la ong ba kane ka jingkynjoh ka kdew ïa ka jingseisoh jong ka jingïatreilang.
U la ban jur halor ka jingdonkam jong ka jingïatreilang hapdeng ki tnad treikam bapher-bapher da kaba kdew ba ka jingïatreilang bad ka ophis C&RD, Social Welfare, tnad pule-puthi bad ka koit ka khiah lem bad ki nongshong shnong ba don ka jingsngewkhia ka long kaba donkam ban pyndonkam hok ïa ki jingdon-jingem, ka jingïakylliang ha ka jingnang-jingtip bad ban pyntikna ïa ka sienjam ka ban khmih bniah ïa ki jingtynjuh kiba ka imlang-sahlang ka ïakynduh.
Katei ka jingïalang ka la sakhi ïa ka jingïashim bynta jong palat 200 ngut ki nongïashim bynta na 32 tylli ki shnong hapoh Betasing Block, ba kynthup ïa ki khlieh nongsynshar shnong, VHC, VEC, ASHA, Anganwadi, SHG bad VO lem bad kiwei-kiwei.
Na ka liang jong ki, ki la sam ïa ki jingshem bad pynpaw ïa ki jingsngew jong ki ha katei ka jingïalang. La buh jingmut ruh ba ki dang don ki shnong ki bym pat biang ïa ki Anganwadi Centre bad la ïakren kumno ban shim ïa ki lad ki lynti ban khmih bniah ïa katei ka mat.
Kum shi bynta jong katei ka jingïalang, la ïadon bynta lang ruh ki nongai jinghikai kiba la wan na ki tnad treikam Sorkar bapher-bapher ba kynthup na MSRLS, NHM, ICDS, SRES bad kiwei-kiwei ban ïarap pynïaid ïa ki prokram ïamir jingmut, da ka jingthmu ban wanrah ïa ka jinglong-jingman ka ban ai mynsiem ïa ka imlang-shalang bad ban sngewthuh halor ka jingdonkam jong ki bynta ba shakhmat jong ka jinglong khyllung, kata naduh ba dang kha haduh 8 snem ka rta.
