Shillong, Naitung 10:
Lai ngut ki briew ba kynthup ïa kawei ka kynthei ki la khlad noh hadien ka jingsuba ba ki la bam ïa u tit uba la kheit na ka jaka khlaw kaba don ha ka thaiñ Umsawli, New Shillong Township.
Katkum ka tyllong khubor na ki pulit, la ong ba ha ka por 5:30 janmiet Sngi U Blei, ka Mawdiangdiang Out Post ka la ïoh jingtip na u kontraktor ka Institute of Science and Bio Resource (ISBR) kaba ha Umsawli ba ka don ka jingsma iwtung kaba la mih na ki 3 tylli ki kamra ba la shong da u ‘Chowkidar’ ha katei ka jaka – kaba don ha ka mala kaba nyngkong jong ka ïingmala kaba la pyntrei ïa ka kam kaba la jan dep.
Ha ryngkat ka jingdonlang jong u Rangbah Shnong lem bad kiwei-kiwei ki nongsakhi, ïa ka jingkhang kaba la khang na shapoh la pynpait bad plie ïa ka.
Ïa kitei 3 ngut kiba la khlad noh la ithuh kum ka Kong Sheba Kharbani (40 snem ka rta) na Mawlai Phudmuri, kaba trei kum ka nongpynkhuid, Bah Rupert Donbor Dohtdong (43 snem ka rta) na Mawlai Phudmuri (nongpynkhuid) bad u Bah Backstar Kharkrang (30 snem ka rta) uba trei kum u ‘Chowkidar’.
Ïa ka met jong ka Kong Kharbani la lap ha kawei ka kamra, katba ïa ka met u Bah Dohtdong bad Bah Kharkrang la lap na kawei pat ka kamra.
Shuh shuh ka tyllong khubor ka pyntikna ba 2 ngut na ki, ki la leit kheit tit na ka jaka khlaw ba marjan ha ka Sngi Palei bad ki met jong ki, ki lah ban don ha kitei ki kamra naduh katei ka janmiet hadien ba la bam ïa utei u tit.
Nalor kane, u khiew uba la pyndonkam ban shet ïa u tit u don lang ha katei ka jaka.
Na ka liang ka Crime Scene Unit bad FSL ki la ïadonlang bad ka Sector Officer, DSP, LO, Kong Joyti Wahlang (MPS) ban khmih bniah ïa katei ka jaka.
Ïa ka ‘Post Mortem’ la pyndep ha NEIGRIHMS bad la pynngat ruh ïa katei ka jingjia kum ka mukotduma UD.
