Mynjur ka JHADC ïa ka ‘resolution’ ban pyrshah ïa ka Uniform Civil Code

Jowai, Naitung 10:

Ka Jaiñtia Hills Autonomous District Council (JHADC) ka la mynjur ïa ka resolution ban pyrshah ïa ka jingthmu jong ka Sorkar India ban pyntreikam ïa ka Uniform Civil Code (UCC) hapoh ka Ri India.

Ïa kane ka resolution la mynjur ha ka Dorbar Lyiur ba shisngi jong ka JHADC kaba la long ha ka Lah Sngi U Blei mynta ka taïew.

U Chief Executive Member ka JHADC, Bah Thombor Shiwat haba wanrah ïa kane ka resolution ha ka Dorbar Lyiur, u la ong, “Ngim tip haduh katno ka jingthmu jong ka sorkar pdeng ban wanrah ïa kane ka UCC bad hadien ba ngi la tip ïa kata ka bor jong ka UCC, ngi tieng ïoh ba kin pynlong aiñ ïa ka. Kumta ngi wanrah da ka resolution ban pyni ka jingpyrshah namar ngim kwah ba ka JHADC bad ka jaidbynriew kin shah ktah ki riti ka dustur bad duh noh ïa ka hok.”

Lada pyntreikam ïa ka UCC, ka JHADC baroh ki riti dustur, ka jingïoh pateng jong ki riewlum kin shah ktah bad khamtam ka hok tynrai ne ka fundamental rights kaba la pynkhamti ha ka Article 19 jong ka riti synshar ka ri kaba ai laitluid ka jingmane blei, la ong u CEM.

Nalor kane, u la kyrpad ïa ka Sorkar pdeng ban kan nym pyntreikam ïa ka UCC hapoh u pud u sam ka JHADC khnang ba ka hok bad ki jingmyntoi jong u nongshong shnong ha rilum Jaiñtia kim nym shah ktah.

Baroh ki dkhot kynthup ka liang pyrshah ki la ai ka jngmynjur ban pyrshah ïa ka UCC.