Shillong, Naitung 10:
U Myntri ka tnat Pule Puthi ka jylla u Rakkam A Sangma u la pyntip ba ki kam ba lait thylli haduh 12,000 tam jong ki nonghikai ha ki skul Lower Primary ka sorkar hapoh ka jylla shen sa pyndap noh.
U Myntri u la pyntip ruh ba ka jingpynbna na ka bynta kine ki kam yn sa pynmih ha ka 14 tarik mynta u bnai.
“Ngi la dep ban shim ka rai ban thung noh ïa ki nonghikai kham kloi katba lah bad ka jingpynbna na ka bynta kine ki kam ba lait, yn sa pynmih ha ka 14 tarik mynta u bnai,” u la ong.
Nalor kane, u Myntri u la pyntip ruh ba baroh kito ki kyrtong kiba la dep ban pass ïa ka MTET ki lah ban thep na ka bynta kane ka kam.
Haba kylli pat ba kan shim por haduh katno ban pyndap lut ïa kine ki kam ba lait thylli, u Myntri u la pyntip ba ïa kine ki kam baroh yn ïaleh ban pyndap ha ka por kumba ar bnai eiei.
