Shillong, Naitung:
U Symbud Myntri Rangbah ka Jylla, Bah Sniawbhalang Dhar u la ong ba ka tnat Pynroi Sor bad ka Home Jail ki la dep ban ïasoi ïa ka soskular na ka bynta ban pynkynriah noh ïa ka Shillong District Jail sha New Shillong Township ha ka jaka kaba don 25 akar. “Ngi la dep ban ïasoi ïa ka jingïateh kular ban pynkynriah noh ïa ka patok sha Mawkhanu, New Shillong Township. Ngin tei noh ïa ka patok kaba thymmai ha ka jaka kaba 25 akar,” la ong u Bah Sniawbhalang Dhar haba ïakren bad ki nongthoh khubor ha ka Sngi Palei.
U la ong ba ïa mynta ym pat lah ban tip katno kan poi ka jinglut jingsep ban tei ïa ka patok kaba thymmai namar ym pat dep ban pynkhreh ïa ka Detail Project Report (DPR) haduh mynta.
“Ïa ka jaka jong ka patok kaba don ha Jail Road ngin sa pyndonkam noh da kaba tei ïa ka Commercial Complex ka ban don ïa ka Mall bad ïa ka jaka pynïeng kali,” la ong u Bah Sniawbhalang.
