Shillong Naitung 10:
Ka Sorkar Jylla ka la soi ïa ka soskular sngewthuh jingmut lane Memorandum of Understanding bad ka National Thermal Power Corporation (NTPC) na ka bynta ban kham pynbha ïa ka rukom sam bording ilektrik bad ka jingpyntreikam ïa ka jingtan bording na ka sngi.
Ka jingsoi ïa kane ka soskular ka la long ha nongbah New Delhi ha ka jingdonlang u Myntri Rangbah Conrad K Sangma, u Myntri ka tnat bording Abu Taher Mondal, u Gurdeep Singh uba dei u Chairman and Managing Director ka NTPC, bad u Sanjay Goyal kum u CMD ka MeECL.
Kane ka soskular ka kynthup ïa ka Project Management Services (PMS) na ka bynta ka kompani ban sam bording bad ka jingbuh ïa ki Power Supply Points (PSPs), nalor ka jingpyntreikam ïa ka Floating Solar ha kane ka Jylla.
Kane ka soskular hapdeng ka Meghalaya bad ka NTPC kan pynbha ïa ka rukom pynïaid bad treikam ka kompani sam bording ha Meghalaya (Meghalaya Discom) ban pyntikna ba ka rukom sam bording kan long kaba kham bha ïa ki paidbah.
Kane ka jingthmu kan nang pynbha ruh ïa ka rukom pynïaid ïa ka MeECL lyngba ka kynhun ki riewshemphang katkum ka jingkhlaiñ bad jingshemphang ka NTPC ha kane ka bynta. Kane kan ïarap ruh ban pynlah ïa ka MeECL ba kan lah ban pyndonkam bha ïa ka jinglah pynmih bording ka MeECL da kaba khlehlang ïa ka rukom pyndonkam da kiwei pat ki rukom pynmih bording ilektrik kiba khuid bad pynbha ïa ka mariang.
Shuh shuh la ong ba da kaba shim ïa ka jingshemphang ka NTPC ha ka rukom pynïaid ïa ki projek, kane ka jingïadei kan nang kyntiew ïa ka jingbiang ki jingtei jingshna bad khanglad ïa ka jingduhnong ka MeECL.
Kane kan pynlong ruh ka jingpule bniah la ka long ne em ban buh ïa ka pump storage plant ka ban ïarap ban pynmih bording bad ïa ka um yn sa pom biang sha ki jaka pyllang um kum ka pung Umïam khnang ba ïa ka um yn sa pyndonkam biang ha ka por ba dawa bha ka jingdonkam ïa ka um.
