Jowai, Naitung 10:
Ha kano ka dur yn ñiew, la ka dei ka jinglait sha rud ka khajna shabar ka pla tyngka ka council ne ba duna jingoh khajna na ki mar khlaw kiba mih na ka rilum Jaiñtia, ha kaba ha ka shisnem ka Jaiñtia Hills Autonomous District Council (JHADC) ka ïoh khajna tang T.10,55,002 naduh u Ïaïong 2022 haduh u Jymmang mynta u snem.
Kane ka la paw ha ka jingkylli kaba la wanrah da u MDC ka Liang Pyrshah u Bah Robinus Syngkon.
U Chief Executive Member ka JHADC, Bah Thombor Shiwat haba jubab u la ong ba na ki lai tylli ki Forest Beat House ka JHADC, ka Ratacherra ka la ïoh lum khajna T.63,700, Mookyndur T.9,81,852 bad ka Garompani T.9,450.
U CEM u la ong ba baroh kine ki beat house ka JHADC ka don mar 10 ngut ki nongtrei. Ha kaba ïadei bad ka jinglait sha rud ka khajna na ki mar khlaw kiba mih na Rilum Jaiñtia bad ka jinglait sha rud ka khajna ka JHADC, u la ong ba ki la pynbeit ïa ka rukom treikam jong ki nongtrei ban tem ïa kino-kino ki jinglait sha rud ka khajna.
