Shillong, Naitung 10:
U MP ka Congress na Shillong, Bah Vincent H Pala u la thoh sha u Myntri Rangbahduh ka Ri Narendra Modi bad kyrpad ba un tuklar na ka bynta ban pyllait noh ïa ka Meghalaya bad kiwei ki jylla kiba hap hapoh ka Khyrnit Hynriew (Sixth Schedule) na ki kyndon jong ka Uniform Civil Code (UCC).
Ha ka shithi ba la thoh sha u Modi, u Bah Pala u la ong ba ka jingpyllait noh kan pyni ïa ka dak jong ka jingïai ban jong u, ban ïada ïa ki lariti bad ruh ban ïada ïa ka hok jong ki paid riewlum.
“Nga don ka jingshaniah kaba pura ba phin shim khia bad sngap ïa kane ka jingkyrpad kaba kyrkieh, da kaba shim bad buh hakhmat ïa ka jingsngew bad jingthmu jong ki paidbah ki ban shah ktah na ka UCC,” u la ong.
U la ong ba katkum ka Khyrnit Hynriew, la don bad buh ki kyndon ba kyrpang sha ki katto katne ki jaka jong ki trai riewlum kum ha Assam, Meghalaya, Tripura bad Mizoram. Kine ki kyndon ki la buh ban ïada ïa ka jinglong kyrpang bad ka jinglong laitluid jong ki trai riewlum kiba shong bas ah ha kine ki thaiñ, u la ong.
U Bah Pala u la kdew ruh halor ka jingdonkam ban ïasyllok bad pan jingmut na ki riewlum na kiwei pat ki jylla shwa ban pyntreikam ïa katei ka aiñ.
