Shillong, Naitung 10:
Ka Synjuk ki Nongsynshar Shnong ka Bri u Hynñiewtrep (SNSBH) ka la thoh sha u Shongknor ka Law Commission ka Ri India ban pynpaw ïa ka jingdawa ba ïa ka Uniform Civil Code (UCC) ym dei satia ban pyntreikam ha ka jylla Meghalaya.
Ha ka shithi sha u Shongknor ka Law Commission, ka Synjuk ka la ong, “Dei ban sngewthuh ba ngi dei ki rit paid ha baroh ki liang bad ngi dei ka jaitbynriew kaba kyrpang, bad ngi donkam ïa ka jingsumar bad jingpeit na ka Sorkar Pdeng bad Sorkar Jylla.”
U General Secretary ka Synjuk, u Bah RL Blah, ha ka shithi u la kdew ba ka jaitbynriew Hynñiewtrep ka kynthup ïa ki paid Khasi bad Jaiñtia, bad lada kheiñ na ka jingdon paid, kane ka jaitbynriew ka long tang khyndiat haba ïanujor bad kiwei pat ki jaitbynriew. U la kdew ba ki paid Khasi Jaiñtia ki don tang kumba 20 lak ngut eiei.
Nalorkata, u la ong ba katkum ki riti ki dustur, ka jaitbynriew ka shim ïa ka jait ka kynja na ka kmie bad ïa kaba kum kane kajuh la leh da ka jaitbynriew Garo kaba don lang ha kane ka jylla.
Ha kaba ïadei bad ka riti bat khyndew bat shyiap, ka Synjuk ka la ong ba ka kham pher na kiwei pat namar hangne, ka khyndew ka shyiap ka dei jong ki nongshong shnong shimet lane jong ka kynhun lane jong ka Kur bad ym jong ka sorkar.
Ka khyndew ka shyiap bad ki jingdon jingem ba ïoh pateng ka leit sha ka kynthei bad ym sha ki shynrang, katba ki shynrang ki lah ban ïoh bynta da ka jingïapynbeit ha la ïing la sem, hynrei kam dei pat ka bynta jong ka riti ka dustur, la ong ka Synjuk.
“Hangne, ka jingïadei briew bad jingïadei Kur hapdeng ki riewlum ka khlaiñ bha, bad ka jingïapher ha ka jingngeit kam pynthut satia ïa kane ka jingïadei,” la ong ka Synjuk.
Nalorkata, ka Synjuk ka long ba kitei ki mat kiba la kdew haneng ki dei tang ki bynta bakongsan jong ka riti ka dustur ka jaitbynriew Hynñiewtrep kaba ka Sorkar India ka la kular ban ïada ha ka por ba ki dkhot ka Federation of Khasi States ki la shah pynbiej ban ïasoh bad ka Ri India.
Ka Synjuk ka la pynpaw ïa ka jingkyrmen ba ki jingpynkylla ki ban wan ha ka Khyrnit Ba Hynriew (Sixth Schedule) lyngba ka Parliament kin long sa uwei pat u mawjam na ka bynta ban pynkhlaiñ ïa ka jingïadei hapdeng ka jaitbynriew Hynñiewtrep bad ki nongshong shnong jong kiwei pat ki bynta ka Ri India bad ba kan nang ïada shuh shuh ïa ka jinglong kyrpang ka jaitbynriew.
Namarkata, na ka daw jong ka jingsngew sheptieng ïa ka jingwan jong ka UCC, ka Synjuk ka la kyntu ïa u Shongknor ka Law Commission ban ai jingmut kaba khlaiñ sha ki bor ba dei khmih bad kata ka long ban pyllait ïa ka jylla Meghalaya baroh kawei na ka UCC.
