Shillong, Naitung 10:
Hadien ka jingïakajia kaba la jia ha ka miet shiteng synñia jong ka 7 tarik mynta u bnai kaba la ïalam shaduh u pud jong ka jingthang kali, ka Dorbar Shnong Laitumkhrah (DSL) ha ka Lah Sngi U Blei ka la leit ban ïakynduh ïa ka Deputy Commissioner (DC) ka East Khasi Hills, Kong R.M. Kurbah ban ïakren halor kumno ban tehlakam ïa kiba kum kitei ki jingjia khnang ba kin ym jia shuh nangne shakhmat.
“Ngi la wan ban ïakynduh bad pynsngew sha ka DC ba ka Dorbar Shnong ka shimkhia ïa kaei kaba la jia ha kato ka miet bad ngi pynrem jur ïa kum kine ki jait kam,” la ong u Rangbah Shnong ka Laitumkhrah, Bah Andrew A. Jyrwa haba kren sha ki lad pathai khubor hadien ka jingïakynduh bad ka DC.
U la ïathuh ruh ba ka Dorbar Shnong hadien ba ka la shong ïa ka jingïalang ba kyrkieh ha ka Sngi Thohdieng jong ka taïew ba la dep, ka la shim ïa ki sienjam ban tehlakam ïa kiba kum kitei ki jingjia naba ka shnong kam kwah ïa kum kitei ki jingjia ban wan jia hapoh shnong namar ka pyni ïa ka dur ka bym itynnad jong ka shnong hi baroh kawei.
“Ka Laitumkhrah ka dei ka shnong kaba suk ba saiñ. Bun ki briew kiba wan sha Laitumkhrah kum ki nongwan jngoh kai ki wan ban ïashim bynta haba ïadei bad shibun kiei-kiei. Ngim khang ïa kiba wan hapoh shnong. Hynrei ngi pynrem jur lada don kum kine ki jait jingjia namar kine ki khang lad pat ïa kito kiba kwah ban wan pynjahthait bad shongkai hapoh ka shnong,” la ong u Bah Jyrwa.
Haba kdew ba ki don ki dukan kiba plie haduh 1-2 baje mynstep watla ym don briew shuh ha surok, ka Dorbar Shnong ka la pynsngew sha ka DC ba ïa baroh ki dukan kiba don hapoh shnong dei ban khang noh ha ka por 10 baje mynmiet bad na ka liang ka DC shen kan sa pynmih hukum halor kane ka bynta.
Ka Dorbar Shnong ha ka miet Sngi Thohdieng ka la sdang ïa ka jingïaid shnong ha ryngkat ka jingsynran lang ka tnad pulit kum shi bynta ban khang lad ïa kiba kum kitei ki jait jingjia ba kin wan jia biang hapoh shnong.
“Kum ka Dorbar Shnong ngi kwah ban weng bad rat dyngkhong ïa kito kiba don jingthmu ban pynkhih win ïa ka shongsuk shong shngaiñ hapoh ka shnong,” u la ong.
Shuh shuh ka Dorbar Shnong ka la pynsngew ruh sha ka DC ha ryngkat ka jingdonlang u SP ka distrik, Bah Sylvester Nongtnger halor ka jingdon jong ki kali bad ar-shaka kiba ju pynher sted haba ki wan sha Laitumkhrah hadien ka por 10-10:30 baje eiei mynmiet namar katei ka buh jingma ym tang ïa ki hynrei ïa ki nongïaid lynti kumjuh.
Haba kylli, u Rangbah Shnong u la bynrap, “Ka shnong ka la shim ka sienjam kaba kham bha – ym tang ban bteng ïa ka jingïaid shnong hynrei ngi la shna ruh ïa ka jingpynbeit pali bad kane kan ïai bteng.”
