Shillong, Naitung 10:
U MP ka Congress na Shillong, Bah Vincent H Pala u la pynpaw ba um don satia kano-kano ka jingpyrshah ïa ka jingthmu jong ka Sorkar ban wanrah lynti rel sha Khliehriat ha East Jaiñtia Hills district.
“Nga hi shimet ngam don jingeh ïa ka jingwan ka lynti rel sha ka thaiñ,” la ong u Bah Pala bad bynrap ruh ba yn nym don mano-mano ruh kiba lah ban khang ïa ki briew ban rung shapoh ka jylla, kiba wan da ki bos, ki trok bad ki kad liengsuiñ.
Halor ka jingïeng pyrshah jur jong ki seng ïa ka projek rel da kaba kdew ba kane kan dei ka lynti jong ka jingïoh lad ban wan rung kyrthlep jong ki briew ba nabar, u Bah Pala u la ong, “Ngam sngew satia ba kane kan dei kaba shisha namar kine ki briew kin wan da ka trok, ka bos.”
U la kyrshan ruh ba ïa ka jingrung kyrthlep lah ban pynsangeh tang ha ki shnong ki thaw ym da kaba buh khyrdop ha ki rud surok bad ong ba lada ki nongshong shnong, ki rangbah shnong bad baroh kin ïatreilang, yn nym don jingeh satia ban ïakhun pyrshah ïa kane ka kam.
Haba kylli la ka sorkar ka dei ban pyntreikam noh ïa ka aiñ Inner Line Permit (ILP) ban pynduna ïa ka jingsngew tieng na ka jingwan rung kyrthlep ki briew lyngba ka rel, une u nongïalam ka Congress u la ong ba ka BJP ka la kren shai ba ka Meghalaya kan hap ban jied la ka kwah ïa ka Sixth Schedule ne ka ILP.
