Yn shah thngan khlem pud sngi ka ACHIK ba kwah pyntreikam ïa ka Roster naduh ba sdang

Tura, Naitung 10:

Ka seng A’chik Conscious Holistically Integrated Krima (ACHIK) kan sdang ïa ka jingshah thngan ba khlem pud sngi naduh ka Sngi Ba-Ar hakhmat ka Mini Secretariat ha Tura kum shi bynta ban pynjur ïa ka jingdawa ban pynrlong ban pynlong ïa ka sor Tura kum ka nongbah ha ka por tlang jong ka jylla Meghalaya bad ha kajuh ka por, ban pynrung kam ha ki jaka ba lait na ka bynta ki Garo.

Katkum u kyrwoh khubor, ïa katei ka jingshah thngan yn ïalam da u Laben Ch. Marak uba dei u ophisar MCS bad MPS barim.

“Ka ACHIK la ka ïai dawa na ka sorkar ba kan pyntreikam ïa ka Reservation Roster naduh ba sdang hynrei ka sorkar kam sngap haduh mynta. Ngi sngew ba ka long ka jingleh bym hok ïa ki A’chik lada wat tang ïa ka ‘Backlog Policy’ ruh ka sorkar kam treh ban ïakren,” la ong ka kyrwoh khubor.

Nalorkata, ka la kdew ba ka Office Memorandum ba la pynkylla halor ka Reservation Roster ka la wanrah jingma ïa ki paid Garo bad ka ‘Backlog Policy’ ruh ka khlem paw satia. Ha kaba ïadei bad ka jingdawa ban pynlong ïa ka sor Tura kum ka nongbah ka Meghalaya ha ka por tlang, ka ACHIK ka la ong ba ka sorkar haduh mynta kam pat shym la ong eiei.

Ka ACHIK ka la khot la wer ïa ki paidbah ba kin ïasnohkti lang ha kane ka jingshah thngan.