Bun tylli ki mat kwah pynsngew ka KHNAM, pyllait paidbah ïa ka shithi na bym ïoh ïakynduh ïa u Myntri Rangbah la slem

Shillong, Naitung:

Ka Khun Hynñiewtrep National Awakening Movement (KHNAM) kaba la pan por ban ïakynduh ïa u Myntri Rangbah u Conrad K Sangma hynrei kam shym la ïohlad ban ïashem bad u markhmat, mynta ka la thoh da ka shithi paidbah kaba kyrpad biang ïa u ban aipor khnang ban ïakren bun tylli ki mat kiba ka seng ka la buh lypa.

Ka KHNAM lyngba u General Secretary u Bah James M.A. Neng ka la thoh shithi sha u Myntri Rangbah ba un ai por bad ka la kdew lypa bun tylli ki mat kiba donkam ban ïakren bad ka Sorkar.

Ki mat kiba ka KHNAM ka la kdew ki long ka Inner Line Permit (ILP), ka jingïakajia pud kaba dei ban pynbeit ha ka wat ba-ar,  ka jingithuh noh ïa ka ktien Khasi ha ka 8th Schedule ka Riti Synshar ka ri India, ka jingïasoh lyngba ki lynti rel bad ka jingktah ïa ki paid Hynñiewtrep, ka jingthmu pyntreikam ïa ka Uniform Civil Code (UCC) bad ka jingktah jong ka ïa ki jaitbynriew ritpaid, ka Inter-state Cadre system, ka rukom thungkam kaba bamsap ha Jylla bad ka jingktah ïa ki samla, ka jingbym lah ka MeECL ban ai bording kaba long neh ha Jylla bad ka jingpynkheiñ ïa ka Electricity (Rights of Consumers) Rules, 2020, bad ka jingsam umbam umdih kaba biang sha ki nongshong shnong.

Shuh shuh ka KHNAM ka la dawa ruh ban pynduh ïa ka ‘personal interview’ haba pynrung kam ha ki kyrdan kiba hap ha Group B, C & C ha Jylla nalor ka jingïakren sani halor ka Reservation Policy bad ka Office Memorandum kaba 14 tarik Jylliew 2023 haba ïadei bad ka Roster system, bad ka jingweng noh ïa ka jingñiew kyrpang ïa ki heh ki haiñ (VIP/VVIPs culture) ha kane ka Jylla Meghalaya.

Ka KHNAM ka la ong ba ka ap bad khmih lynti ba kan ïoh ïakynduh ïa u Myntri Rangbah ka Jylla ban ïakren ïa kine ki mat kiba la kdew.