Shillong, Naitung:
Hadien ka jingïoh jingujor na ki paidbah nongshong shnong ka thaiñ Mawryngkneng halor ka jingbym don ki doktor, ki nos bad ki nongtrei ai jingsumar kiba don hapoh ka Mawryngkneng Community Health Centre (CHC) ha ka por long trei, na ka liang ka Hynñiewtrep Integrated Territorial Organisation (HITO) Mawryngkneng Circle ha ka Lah Sngi U Blei ka la leit ban aiti da ka shithi jingujor sha ka shlem treikam jong ka Director of Health Services (DHS) ka Sorkar Jylla kaba don ha Shillong halor kane ka jingkheiñ sting jong kane ka jaka jingai jingsumar.
Ha ka shithi jingujor ba la aiti sha DHS ha katei ka sngi, ka seng ka la ong ba ki paidbah katei ka thaiñ ki la shem jingeh shikat dei eh khamtam lei lei ïa kito kiba wan na ki longïing longsem kiba duna ka ïoh ka kot. Ka seng ka sngew ruh ba ka long kaba donkam ban pynkhlaiñ ïa ka rukom treikam khamtam ba katei ka CHC ka dei kaba dang shu kiew kyrdan da kaba pynrung kam ïa ki doktor, ki nos bad nongtrei ba kin lah ban ai jingshakri kaba paka sha ki paidbah nongshong shnong kiba hap hapoh katei ka thaiñ.
Kumta na ka liang ka seng kaba don ïa ka jingkitkhlieh ka la dawa na katei ka shlem treikam ba kan weng lane pynkynriah kam noh ïa ki doktor bad ki nongtrei kiba don ha katei ka CHC bad ban pynrung shuh shibun ki doktor bad ki nos na ka bynta ka bit ka biang bad ka jingmyntoi jong ki paidbah ka thaiñ baroh kawei.
Na ka liang u President ka HITO Mawryngkneng Circle, u Bah Gary S. Myrboh u la ong na ka liang ka seng hadien ba ka la ïoh ïa katei ka jingujor na ki nongshong shnong ka thaiñ, ka la leit dalade sha katei ka CHC ha ka janmiet jong ka sngi Saitjain bad ka la lap ïa ka jingshisha halor kane bad utei u President u la ïathuh ruh ba ha katei ka jingleit jurip jong ka seng, ka la lap ba ka doktor bad ki nos kim don satia ha katei ka jaka ai jingsumar ha katei ka por bad ka doktor hadien katto katne por eiei, ka la wan rung tuh nadien bad ka la leh kumba ka dang bunkam.
“Haba ngi wan hangne, ngi shem hi ruh bad ka ‘video’ ruh ka don ba ki katto katne ngut ki nongshong shnong ki la phah sha ngi, hadien ba ngi la ïoh ïa kata ka ‘video’ ngi la wan peit da la ki jong ki khmat hangne bad ngi la lap ruh ba ka dei kaba shisha, ngi lap ruh ba i doktor i dang shu wan bad rung myntan nangtei nadien, kita ki nos ruh kim don hi re”, la ong u Bah Myrboh.
U Bah Myrboh u la ong ruh ba haba na ka Primary Health Centre (PHC) mynta la kyntiew sha ka CHC, ka jingai jingsumar ka dei ban long kaba bit ba biang, kam dei ban long ba haduh u pud ba lada don kano kano ka jingjia jingmynsaw ïa ki paidbah hynrei lada ki wan ha katei ka jaka ai jingsumar, ki hap ban da leit wad ïa ki doktor ne ïa ki nos sha ka jaka sah jong ki.
